Аьпалул ва кьурчIишиврул кьини Дагъусттаннал БакIчи Рамазан АьбдуллатIипов лаивзунни республикалул агьалинайн.

«Июньдалул 22 – Хъунмасса Буттал кIанттул цIанийсса дяъви байбивхьусса апатIрал кьинир, жула билаятрал тарихравугу, гьарца совет инсаннал оьрмулувугу ццаххандарал аьш кьадиртсса. Жулва аьралуннал ва дяъвилул къинттуллух зий бивкIминнал ватан ххирашиврул ва чувшиврул бакIрайра ккаккан дурну диркIссар дяъвилул ахир ссайн дуккантIиссарив.
Совет саллатIнал дуниял ххассал дурссар фашист мусиватрая ва дурурччуссар цалла Ватандалул тархъаншиву.
Хъунмасса Буттал КIанттул цIанийсса дяъвилий талай бивкIссар 180 азарунная ливчусса дагъусттанлувтал, гьарца кIилчинманал жанну дуллуссар Бюхттулсса Ххувшаврил цIаний. РяхцIаллий кIия дагъусттанлувнан дуллуссар Совет Союзрал Виричунал цIа, арулуннал ларсъссар Славалул орденну, ацIазарахъул дагъусттанлувтуран дуллуссар дяъвилул орденну ва медаллу. Жува пахрулий буссару Аьрасатнал саллатIнал ва хIаписартурал ккаккан дурсса виричушиврия ва кьянкьашиврия. Миннаха аякьа даву ва ливтIуминнал аьпа абад баву – жуйвасса мубараксса буржри.
Даимансса аьпа баннав Ватандалухлу жанну дуллуминнал.
Аьзизсса ветерантуран ва циняв дагъусттанлувтуран чIа тIий ура дакьаву, паракьатшиву, цIуллушиву ва барачат!».