Июньдалул 21-нний МахIачкъалаллал Дусшиврул къатраву АьФ-лул къатри даврил ва ЖКХ-лул министрнал хъиривчу Андрей Чибислул ва ДР-лул БакIчи Рамазан АьбдуллатIиповлул каялувшиврулу ххал бивгьунни къатта-къушлил аралувусса приоритетсса проектру дузрайн дуккан даврил масъалартту, мукунма инсантал кугьна хьусса къатравату бизан баврил ва капремонтрал масъалартту.
Рамазан АьбдуллатIиповлул бувсунни билаятрай ЖКХ-лул бутIуйсса захIматшивурттая. «Республикалия ва цаймигу регионная Москавлив бучIайсса циняв аьрзардал мукьва бутIул ца бутIа ЖКХ-лул тагьарданул хIакъиравусса бур», — увкунни ДР-лул БакIчинал. Мунал бувсунни мукунма циняв зий бушиву агьали марцIсса щинал щаллу баврил ва ххуйсса хIаллихшинну дузал даврил цIаний.
Хъирив ихтилат буллай, Андрей Чибислул увкунни: «На ххарину ура Дагъусттаннай агьали марцIсса щинал щаллу баврин хасъсса ххуйсса давуртту дурну душиврия. Къатта-къушлил бутIуй дурсса дахханашивуртту на ккалли дуллай ура хьхьичIуннайшиврун».
Ялами масъалартту ххал бигьлай бия, прессалул вакилтал бакъа.

ХIадур бувссар ХI. Аьдиловлул