Майрал 9-нний МахIач­къалаллал хъунмур майданнив хьунни шадлугърал митинг. Ганий гьуртту хьунни Дагъусттаннал БакIчи Рамазан АьбдуллатIипов, ДР-лул ХIукуматрал Председатель Аьб­дуссамад ХIамидов, ДР-лул БакIчинал ва ХIукуматрал Администрациялул Каялувчи Исмяил Апанниев, ДР-лул Халкьуннал Мажлисрал Председательнал 1-ма хъиривчу Сай­гидахIмад АхIмадов, хъуншагьрулул мэр Муса Мусаев ва цаймигу. Митинграй гьуртту хьунни цинявппагу 15 азарунная ливчусса инсантал.
Хъунмасса Буттал кIанттул цIанийсса дяъвилий Ххувшаву ларсун 72 шин шаврин хас дур­сса митинг тIитIлай, Муса Мусаевлул бувсунни ва байрандалул мяъналия: «Бюхттулсса Ххувшаврил бакIщаращину хьуссар жула билаятрал халкьуннал цашиву ва лагма лагаву, лавайсса даражалул ватан ххирашиву, аьралуннал ва дяъвилул къинттуллух зий бивкIминнал лахIан дуван къашайсса кьянкьашиву ва чувшиву. Уссушиврий­сса халкьуннал кьюкьлувух талай бивкIссар 180 азарунная ливчу­сса дагъусттанлувтал, 62 дагъусттанчунан дуллуссар Совет Союзрал Виричунал ва Аьрасатнал Виричунал цIа. Жунма дакIний бикIан аьркинссар цуксса захIмат хьуссарив Ххувшаву ласун», — увкунни М. Мусаевлул.
ДР-лул Аьрали комиссар Дайтбаг Мусттапаевлул бувсунни цукунсса гьунарду ккаккан бувну бивкIссарив дяъвилий Дагъусттаннал цаппара Вирттаврал – АхIмад-Хан Султаннул, Валентин Эмировлул, Юсуп Акаевлул, МахIаммад ХIажиевлул ва чIявусса цайминналгу.
Митинграй махъру лавхъунни мукунма Хъун дяъвилий гьуртту хьусса Аьли НурбахIандовлул, ДГУ-рал студентка Алипат ТIалхIатовал ва цайминналгу.