Шиная шинайн ххялтIа дуклай дур Ххувшаву гъан дуллай бивкIминнал кьюкьри. Сайки 10 шин хьунни дяъвилул гьурттучи Ибрагьиннул арс СалихIов Ибрагьин дунияллия лавгун. Амма ва хIурматрай дакIнийн утай шяраваллил жяматрал. Увну ур Ибрагьин 1920 шинал Лакрал райондалийсса Ккуцрал шяраву.
Ибрагьин буттал лажин къа­ккарксса оьрчI ивкIун ур. Ванал ппу ивкIуну ур граждан дяъвилий. Му чув увччуссариввагу кIулну бакъар.
Ибрагьиннуя ниттил бувмур кIулсса, захIмат ххирасса жагьил хьуну ур. Бухьунссия ваналгу, цинявппа жагьилтурал кунма, цала хияллу, бухьунссия ниттилгу арснайн чIявусса хьул-умудру. Амма дяъви байбивхьуссар тIисса кьурчIисса хаварданул инсантурал хияллу микIлачIун бувну бур. Ниттингу цила ца акъа-акъасса арс аьрайн тIайла уккан багьну бур.
Ибрагьин увцуну ур дяъвилийн 1942 шинал. Му чIумал ва 22 шинавусса жагьил ивкIун ур. Цахъи хIаллай дуклакигу увну, артиллериялул расчетрал командирну ивтун ур. Ва гьуртту хьуну ур Ухссавнил Ккавкказуллал фронтрай — Моздокрал, Ставрополлал, Майкопрал чулийсса. 1942 шинал Ибрагьин гьуртту хьуссар Эльхотовуллал къапурдачIасса, душман Владикавказрайн ххявххун нанисса къизгъинсса талатавурттаву. Ухссавнил Ккав­кказнайн гьужум бан къулайсса кIанттурду буну тIий, 1942 шинал душманнал шиккун чIявусса аьрал бивчуну бивкIссар. Шикку хьусса данди бацIавриву совет аьралитурал бат дурссар 300-ннийн дирсса немецнал танкарду, 5 азарунния ливчусса немецнал саллатI ва хIаписартал. Гуж ххишаласса бунугу, душманнаща къабювхъуссар гъагъан Ккавкказуллал къала буручлачими. Лавкьуссар душманнан Ккавкказнавунсса ххуллу. Вай талатавур­ттаву Ибрагьиннуйн щаву дирну дур. Моздок шагьрулийсса госпитальданий хъин хъанайгу ивкIун, къулай шайхту, цIунилгу душман ххит уллан лавгун ур. 1943 шинал ахирданий цIунилгу захIматсса щаву дирну, талансса тагьарданий акъашиврийн бувну, шавай гьан увну ур. Дяъвилия увкIун махъ Ибрагьин зий ивкIун ур колхозрал бухгалтерну, шяраваллил советрал секретарьну, ОТФ-рал ва МТФ-рал заведующийну. Дяъвилий ккаккан дурсса къучагъшиврухлу ванан дуллуну дур ЯтIул ЦIукул орден. Му дакъассагу, Ибрагьиннул дур «За доблесть и отвагу», «За Победу над Германией» медаллу, «Фронтовик 1941-1945» лишан.
Лайкьсса оьрмугу бувтун, 87 шинаву дунияллия лавгун ур Ибрагьин.
Ванал махъ ливчIун бур ххаллилсса наслу – 2 арс ва 5 душ. Щак бакъар, вайннал оьрчIалгу, оьрчIал оьрчIалгу лайкьну буруччиншиврий ххаллилсса тта­ттал аьпа.

А.Аьбдуллаева