Майрал 27-нний Дагъусттаннал БакIчи Рамазан АьбдуллатIипов гьуртту хьунни «РувхIанийсса культура – халкьуннал аьм¬сса ххазинар» тIисса дунияллул халкьуннал дянивсса конференциялий. Му бувссар Евразиянал Халкьуннал ассамблеялул 1-мур съездрал хъаттиралу.

Проектрал модераторталну бия юрист элмурдал кандидат, РувхIанийсса культуралул Дунияллул форумрал президиумрал член Юрий Алешин, «Мир через культуру» тIисса Дунияллул халкьуннал дянивсса ассоциациялул вице-президент, РувхIанийсса культуралул Дунияллул форумрал сопредседатель Толеген МухIаммаджанов (Къазахъисттан), ва форумрал халкьуннал ассоциациялул вице-президент, РувхIанийсса культуралул Дунияллул форумрал сопредседатель Вильгелм Августат.
Рамазан АьбдуллатIиповлул док¬лад бунни «Ттизаманнул дуниял рувхIанийну цIу дуккан давриву¬сса Евразиянал бакIчишиву» («Евразийское лидерство в духовном обновлении современного мира») тIисса темалул хIакъираву.
«Ттизаманнул дунияллий чIявуну хъанай дур кризисру трансформацияртту, амма жува кIура баллай буру халкьуннал ва билаятирттал хьхьичIрасса рувхIанийсса культуралийн ва хIала-гьурттушивурттайн, луглай буру цIу-цIусса моделлах. ХХI ттуршукулий халкьуннал чIяруми культурарду, динну, рувхIанийсса традицияртту ялу-ялунгу хIала духлай дур, гъан хъанай дур.
Амма инсантурахун дахчилай дур аьвамшиву, оьшиву, зид, къащи. Му аьвамшиву ялу-ялун гьарта-гьарза хъанай дур, муния инсаният¬ран хъуннасса нигьачIаву ялун най дур», — тIий бур докладраву.
Конференциялий ихтилатру бунни цайминналгу.

ХIадур бувссар ХI. АЬДИЛОВЛУЛ