Оьрмулул ца агьамсса шачIанттуйх ша ласласисса кьинину шай школарттал дуклаки оьрчIал майрал 25-мур кьини. Ва кьини 11-мур класс къуртал буллалисса оьрчIан бищай махъва-махъсса гюнгутIи. ТIааьннну бюхлахисса гюнгутIул чIурдал оьрчIал дакIурдиву хIасул дувай ца караматсса, кьюлтIсса гьулусаншивугу.

Ккуллал райондалийсса циняв школарттай дуклай бивкIун бур гьашину 868 оьрчI. Вайннавату гьашину школа къуртал буллай усса ур 53 оьрчI. УрчIва класс къуртал буллай усса ия 82 оьрчI. Школа къуртал буллалисса оьрчIру бур: Хъусращиял школалий – 10, Ккуллал 1-мур школалий – 11, Ккуллал 2-мур школалий – 13, Ваччиял школалий – 3, ЧIяйннал школалий – 7, Вихьуллал школалий – 10, 2-мур ЦIувкIуллал школалий – 1.
Гьашинусса оьрчIал байрандалух ябитан на лавгссияв Ваччиял школалийн. Гьарун Саэдовлул цIа дирзсса школалул хIаятраву дия байран. Циняв школалул классирттал оьрчIру бия ккуран дурну бавцIуну. Оьрмулул гьартасса ххуллийн буклакисса оьрчIру барча бувна школалул директор Бажи Мирзоевал, нитти-буттахъал, райондалул культуралул каялувчи Марина Ибрагьимовал ва цайминналгу. Буллуна оьрчIан шинал мутталий хьун дурсса ккаккиярттахлу дипломру, грамотартту. Ккаккан дурна дуклаки оьрчIал къавтIавуртту, дурккуна дикломацияртту, увкуна балайрду.
Амма цакуну ялун дирсса гъаралуннил байран дяличIан дурну, гания гихуннайми тяхъашивуртту спортзалдануву дуван багьуна. Гиву бивщуна махъва-махъсса гюнгутIигу.
Ххуллухъин баннав зун, оьрчIрув! Зал архIалсса ххуллу хьуннав!

ХIажимурад ХIусайнов