Шагьнавазлул арс Щиллаев Казбек

Оьрмулул 50 шинаву аьпалухьхьун лавгунни Вихьуллал шяравасса Шагьнавазлул арс Щиллаев Казбек.

Увну ур Казбек 1967 шинал. Школа къуртал бувну махъ бувккуну бур Механикалул техникум, яла Вологда шагьрулий къуртал бувну бур юридический академия.

Зий ивкIун ур Вологодскаллал идарарттай юрист-консультантну. Чув зурчагу, Казбеклул ккаккан бувссар цува грамотнайсса, даву кIанийн дагьан дурну дайсса, лагма-ялттунащал хIал бавкьусса, дакI-аьмал хъинсса, яхI-къирият ду­сса инсан ушиву.
ХIайп, лавгунни оьрмулул аргъираву, махъмигу аьсивну кьабивтун. Щукрулий бур так, архсса Карелиянава лавсун бувкIун, цала ватандалий уччин бюхъаврийн.
Казбек аьпалул шаврил хъуннасса кьурчIишивугу кIидачIлай, жижара буллай буру ниттихь, буттахь, уссурваврахь, ссурваврахь, арснахь, душнихь, кулпат­рахь ва махъсса цинявппагу гъан-маччанахь.
Цал гьав нурданул дуцIиннав, рухI бигьаний дишиннав. Махънал оьрмурдай барачат бишиннав. Амин.
Чаннасса ссавния
къув-аьс увкунни,
Хар-хавар бакъасса
буран бивщунни,
Зунттул хъархъалаксса,
ккаккиялунсса,
Аслансса, иминсса,
хIакьсса лаккучу
Лавмартсса цIуцIаврил
кьакьан увунни.
Цан хьхьара дав, Казбек,
Къютихъал пахруй,
Вихьуллал ссурулу ца
яргмур цIукуй,
Вила нитти-буттал дакI
цан гъагъан дав,
Вихьуллал вирттаврал
яхI цан лахIан бав.
Лакрал миллатрачIан
оькьини дуркIни,
ХьхьичIа-хьхьичI нанима
инаяв, Казбек,
Ххючухъал МахIаммад
вищал архIал най,
Пахрулий пиш-пиш тIий,
вих-я ургайсса.
Вихьуллал жямат

---

Аьбдуллул душ СултанахIмадова Шамалай

Вай гьантрай аьпалул хьунни иминсса хасиятрал заллу, хIакьсса педагог, яхI-къириятрал бувцIусса, кIулначIа цил хIурмат лавайсса, хъунмур оьр­му школардай дарсру дихьлай хIурматрай гьан бувсса хъамитайпа, ТIагьиров Аьбдуллул ва Щагьрубанил кулпатраву був­сса душ СултанахIмадова Шамалай.

Шамалай бувну бур 1933 шинал Гьанжилив. 1951-ку шинал дянивмур даражалул школагу къуртал бувну, бувххун бур дук­лан Дагъусттаннал хъаннил институтравун. Институт къуртал бувкун, 1953 шинал гьан бувну бур Ккуллал райондалийн, Къяннал школалийн, географиялул дарсру дихьлан. Му школалий зий кIира шин дурну махъ бувкIссар зун Ккуллал дянивмур даражалул школалийн. Муния махъ Шамалай зун бивкIссар цила буттал шяраву, ЧIяйннал дянивмур даражалул школалий.
1968 шинал мунин цила кулпатращал бизан багьссар МахIачкъалалив. Мура шинал бувхссар зун тарбиячину музыкалул училищалийн. Микку зий лахъи къалавгун, лавгссар Альбуриккантливсса 20-мур школалийн, гайра цинна ххирасса дарсру дихьлан. Пенсиялийн букканнин зийгу бивкIссар му школалий. Ларайсса ккаккиярттахлу ванил хIалал дурссар чIярусса хIурматрал грамотар­тту, ларайсса бахшишру.
Цила лас АхIмадищал, хъунигу бувну, оьрмулул ххуллийн бивчуссар кIива душ ва шама арс.
Шамалай аьпалул шаврил хъуннасса кьурчIишивугу кIидачIлай, дакIнийхтунусса жижара буллай буру ванил арсурваврахь, душваврахь, миннал оьрчIахь ва махъсса цинявппагу гъан-маччанахь. РухI алжаннул ххари даннав, гьав нурданул дуцIиннав.

ЧIяйннал жямат

---

ДакIнийхтунусса кьурчIишивугу кIидачIлай, жижара буллай буру уссурваврахь, ссурваврахь, цинявппагу гъан-маччанахь,

Ибрагьиннул арс Мяндиев МахIаммад-Сани
жуятува личIи шаврийн бувну.
Цал гьав нурданул дуцIиннав, алжаннул ххари аннав, махънал оьрмурдай барачат бишиннав.
ЦIусса миналийсса ЧIурттащиял жямат