КIилийну бигьасса ххуллу

ХьхьирийхчIин Индиянава Саоьдуллал Аьрабусттаннайн хIажлийн занансса маршрут зун диркIун дур .

Му маршрут къазий 22 шин хьуну дур. Индиянал хIукуматрал баян бувну бур хьхьирил маршрут тIитIаврийну хIажлийн наниминнал ххуллул багьа 50 % кьюкьлакьишиву. 2018 шиная тинмай гьарцагу къулайшиннарду дусса жамирду занан тIий бур Мумбаилия, Калькуталия ва Кочилия Джиддалив. Ца жамилийн лагайсса ур ххюазара инсан.

Лахъи-кутIасса зумарду

Пакистаннал интернет- изданиялул дурну дур зума дугьан захIматми билаятирттал сияхI. Пакистаннай 16 ссятрай зума дугьан багьлай бусса бур. Исландиянавусса бусурманнан сайки 22 ссятрай зума дугьан багьлай бусса бур, Швециянаву – 20 ссятрай. Европанавугу зума дугьаврил чIун лахъисса хъанай дур, дянивну 19 ссятрай дугьан багьлай бусса бур. Маккалив ва Кьиблалул Машрикьуллал Азиянаву зума дугьайсса дур 16 ссятрай, Нигериянаву ва Малайзиянаву -14 ссятрай. Бразиялиянаву ва Индонезиянаву зума дугьайсса дур 13 ссятрай. Австралиянаву – 11 ссятрай. Чили республикалий зума дугьан багьайсса бур 10 ссятрай. Тикку цIана кьурукIи дусса дур.

ЛичIи хьунсса кьаст малахIару

Магърибуллал Зуманивсса палестин аьрщарал хъунама судья МахIмуд аль-Хаббашлул Рамазан зуруй кулпатру личIи шаврин къадагъа дуллалисса хIукму бувну бур. Му дакI дарцIуну ур зума дургьусса лас-щарнил личIи хьунсса пикри баххана буван бюхъайшиврий. Каялувшиву «Хамас» ккурандалухь дусса Газалул Секторданийн къабагьлай бусса бур ва хIукму.

«Рамазан зурул чятир»

Гьар шинах кунма, гьашинугу Москавлив зума итадакьин ччими батIавансса чятир бивщуну бур Мемориал мизитрал чIарав, Поклон зунттуй. АцIния кIира шинни «Рамазан зурул чятирду» бишлай Москавлив, 1500 инсан атIайсса ур миккун гьар кьини зума итадакьин. Му, ихIсандалул проект дакъагу, культуралул проектгу хъанай дур, микку Къиримнал, Ингушнал, мукунма Дагъусттаннал кьинирдугу дуллан тIий бур.

ХIадур бувссар П. Рамазановал