Майрал 17-нний Рамазан АьбдуллатIипов Грозналий гьуртту хьунни «Аьрасат – исламрал дуниял» тIисса Стратегия зумувсса ябитаврил группалул пленар батIаврий (Группа стратегического видения).

Му группа сакин бувну бивкIссар 2006 шинал Евгений Примаковлул ва Минтимер Шаймиевлул каялувшиврулу, Аьра­сат исламращалсса хIала-гьурттушиврул сакиншиндаравун цачIун хьуну махъ (организация исламского сотрудничества). Ва Группалул координатор хъанахъиссар МГИМО-лул Цивилизациярдал партнерствалул центрданул директорну зузисса Вениамин Попов.
Группалул ярглийсса батIав­рин хасну АьФ-лул дазул кьа­тIаллил иширттал министрнал хъиривчу Михаил Богдановлул дурккунни В. В. Путиннул цIаниятусса ссаламрал адрес.
Татарсттаннал президент Рустам Миннихановлул бувсунни вихну ушиву ва батIаврий хьусса ихтилатирттая хъунмасса кумаг хьуншиврий.
Чачаннал Республикалул БакI­чи Рамзан Кьадировлул бувсунни ва батIаву Грозналий циван дуллалиссарив. «Жул республикалул дусшиврийсса дахIаву дур Гъанмур Машрикьуллал чIявуми билаятирттащал. Жу чIярусса шиннардий гай билаятирттащал хIала-гьурттуну зий буру. Махъсса шиннардил яла захIматмур масъала хъанай бур дунияллул халкьуннал терроризмалиясса нигьачIаву. ЦIана мусиватсса ишру хъанай бур Сириянаву ва Иракьнаву, тикку литIлай бур тахсир бакъасса инсантал. Чачаннал халкьуннан кIулссар дяъвилул циксса баларду бакIрачIан буцайссарив. Террористътурал кьаст дуруна жул аьрщарай цIакь дуван цалла низам, ялув духIан щялусса идеология. Чачаннал Республикалул 1-ма президент, Аьрасатнал Виричу АхIмад-хIажи Кьадировлул дащуй бивхьуссар террористътал ва экст­ремистътал. ХIакьину, АьФ-лул Президент В. В. Путиннул политикалийн бувну, Аьрасат хъанай бур исламрал яла дакI тIайламур союзник ва кумагчи», — кунни Рамзан Кьадировлул.
Дагъусттаннал БакIчинал дакIнийн бувтунни исламрал дунияллущалсса хIала-гьурттушиву Аьрасатнал паччахIлугърал кьатIаллил политикалул ца яла агьаммур чулну хъанай бушиву. «Му иширал хъунмасса кIану бугьлагьиссар личIи-личIисса билаятирттал бусурманнал дянивсса арарду ххуй давриву», — увкунни ванал. Рамазан АьбдуллатIиповлул мукунма бувсунни, Владимир Путиннул дачин дурсса политикалийн бувну, Дагъусттаннайгу, Чачаннавугу террористътураяр ххув хьун бювхъуну бушиву.
Аьрасатнал исламрал дунияллущалсса дахIавурттал хIакъираву бувсунни Къирим Республикалул БакIчи Сергей Аксеновлул.
БатIаврий ихтилатру бунни мукунма Иракьнал Парламентрал Председательнал хъиривчу Хумам Бакер Аьбдулмажид Хаммудлул, «МухIаммадия» тIисса Индонезиянал исламрал жяматийсса организациялул председатель МухIаммад Сиражуттин Шамсуттиннул ва цайминналгу.

ХI. Аьдипов