МахIачкъалалив хьунни Щалвагу Аьрасатнал МФЦ-рдал форум

Майрал 11-12-нний Ма­хIач­­къалалив хьунни «ПаччахIлугърал хIаллихшинну даву – властьрал инсаннащал­сса ара чIалачIи давур» тIисса, Щалвагу Аьрасатнал форум.

Пленар батIаврий гьуртту хьунни АьФ-лул экономикалул министрнал хъиривчу Савва Шипов, ДР-лул ХIукуматрал Председатель Аьбдуссамад ХIамидов, Азирбижанная бувкIсса пишакартал, рес­публикалул цаппара министерстварттал ва ведомстварттал вакилтал.
БатIаврий гьуртту хьуминнал хьхьичI махъ лахълай, Аьбдуссамад ХIамидовлул бувсунни муниципал хIаллихшинну даврил масъалартту республикалул властьрал органнал давур­ттаву приоритет думиннун ккаллину бушиву. «Махъсса шиннардий Дагъусттаннай паччахIлугърал хIаллихшинну дайсса МФЦ-рдал система дузал даву хъанахъиссар ца яла ххуймур давуну. Жулла рес­публикалий, цаппара регионнай кунна, му даву ххуй­сса даражалий дачин дурну дур», — увкунни Аьбдуссамад ХIамидовлул. Ганал бусаврийну, Дагъусттаннай МФЦ-рду хIасул хьуну бур 2009 шинал.
«Жуща бювхъунни буван 56 центр ва 435 МФЦ-рдая архсса кIантту-кIанттурдай офисру», — увкунни премьер-министрнал.
Дагъусттаннай МФЦ-рду бавриву хьун дурсса хьхьи­чIун­найшивурттая бувсунни Савва Шиповлулгу.
Дагъусттаннай МФЦ-рдал система зузи даврил хIакъираву бувсунни «ДР-лийсса МФЦ» ГАУ-рал министр-директор ХIусман ХIасбулатовлул. Ганал бусаврийн бувну, МФЦ-рдал хIаллихшинну ишла дуллай бур 97,62% агьалинал. Миннан дуллалиссар 400 журалул хIаллихшин. 2016 шинал Да­гъусттаннал агьалинан дурну дур сайки 2 млн. хIаллихшиннал. Гьашину 4 зуруй дурну дур 800 азарда хIаллихшин.
Пленар батIаврил ахирданий хъамаллурал жавабру дуллунни журналистътурал суаллахьхьун.

ХIадур бувссар ХI. Аьдиловлул