Хъунмасса Буттал КIанттул цIанийсса дяъви байбивхьу­сса чIумал Ватан душманная дуруччин лакрал мюрщи щархъава чIявусса жагьилтал хушрай аьрайн лавгссар. Инишиял шярава хушрай аьрайн лавгминнавух ивкIссар Атайл арс Наби Атаевгу.
Дяъви байбивхьусса чIумал Наби Энгельслул цIанийсса колхозраву зий ивкIун ур. Аьрайн увцуну ур 1942 шинал. Цалчинсса гьантрайва Наби Сталинградуллал фронтрайн агьну ур. Сталинград шагьрулул цIаний цукун къизгъинсса талатавуртту най диркIссарив, жунма кIулссар,
57 хьхьугу, кьинигу жандалия ка ларсун талай бивкIссар Сталинград душманнал кIунттихьхьун къагьан Совет аьралитал. ЧIявуссаннал жанну дуллуссар, чIявуссаннайн щавурду дирссар, амма Сталинград бурувччуссар ва мунийну Ккавкказуллал куртIнивун бувххун нани­сса душманнал аьрал бацIан був­ссар. Набигу, Сталинград буручлачисса къизгъинсса талатавурттаву захIматсса щаву дирну, ца каницIа хьуссар. Тай талатавурттаву Набинал ккаккан дурсса къучагъшиврия чивчуну бивкIун бур 1943 шинал мартрал 3-нний бувксса «Правда» кказитрай, мура шинал апрель зуруй бувксса «Кьиблалул фронт» кказитрай.
Сайки ца шин хьуну дур Набинал госпитальданий хъин хъанай, 1944 шинал, захIматсса щаву сававну, ва шавай тIайла увккун ур. ­Аьрая увкIун махъ Наби зий ивкIун ур халкьуннал хозяйство цIу дуккан дуллай колхозраву, мукунма Хашури тIисса Гуржиял шагьрулий.
Набинал лайкь дурсса наградарттавух дур «За Победу над Германией», «За доблестный труд» ва цаймигу медаллу.
Дунияллий уссаксса хIаллай Ватан душманная дуручлай чулахъ хьусса ветераннал хIурмат ххишаласса бивкIун бур шяраваллил жяматрачIа. Ишин-итан кIану бакъа, хъихъи ивтун ивкIун ур шанмагу душнил. Чан къадай­сса диркIун дур Набинахсса аякьа паччахIлугърал властьрал органналгу.
1981 шинал дунияллия лавгун ур Наби. Амма ва уттигу бусраврай дакIнийн утай гъан-маччаналгу, шяраваллил халкьунналгу.

ХIадур бувссар А. Аьбдуллаевал