Ва чагъар бувкIунни «Илчи» кказитрал редакциялийн МахIачкъала шагьрулул №38 школданул 4 «3» классрал нитти-буттал (40 оьрчI-бакI бусса) цIанияту. «Жу, оьрчIал нину-ппу, МахIачкъала шагьрулул 38-мур школданул 4 «3» классраву дарсру дихьлахьисса учительницахь, ххаллилсса педагогнахь, дакI марцIсса, цилва оьрчIах куннасса къулагъас жул оьрчIах дусса инсаннахь Убурдал шяраватусса Апанниева Лайла МахIаммадовнахь хъунмасса барчаллагь учин ччай буру «Илчи» кказитрайхчил».
Лайла МахIаммадовнал, оьрчIал цIаний хъунмасса захIмат бихьлай, гьарцаннахунсса ургъил-аякьа ляхълай дуккаврих гъира-шавкь дусса, хъинбала-хъиншиву дан анавар буклакисса оьрчIру буван хIарачат буллай бур. Мукун бушиву шаппа жунгу чIалай бур оьрчIал тIул-тIабиаьтрайну, занакьулушиндарайну. Жу жунма хъинну хъунмасса тIайлабацIу хьушиврун ккаллигу буллай буру Лайла МахIаммадовна бакIрайн багьаву жула оьрчIахь дарсру дихьлан.
Лайла МахIаммадовнайн ца жу, 40 оьрчI-душнил нину-ппу бакъассагу, бур барчаллагьрай школданийсса махъсса оьрчIал нину-ппугу. Ванил личIи къабувай оьрчIру, цинявппа цакуцну ккаккай. Цилла 26 шинай муаьллимну зий бивкIсса опыт ванил ххишала бакъа куртIну оьтту-ттурчIавун бувххун бур, ва оьрчIахсса ччаврил хъиннува ялун личин буллай бур. Жугу дакIру дарцIуну буру укун ххаллилсса педагогнал кIулшиврул гьану бивзсса жулва оьрчIая гьарзатраву итххявхсса чIава жагьилтал букканшиврий.
Лайла МахIаммадовнай, жу вин чIа тIий буру вила дакIнин ччикунсса лахъисса, талихI-тирххандарал вибувцIусса цIуллусса оьрму. Дулуннав вихьхьун Заннал чIярусса шиннардий дагъусттан оьрчIая хIакьсса чув-арамтал буллансса цIуллушиву!
ОьрчIал нитти-буттал чулуха Абакар
ва Светлана Султановхъул
