Ккуллал райондалул бакIчи Сулайманов Сяидлул цала давриву агьамсса кIануну хIисав бувай цачIанма чивчусса жяматрал тавакъюрал чагъардан жаваб дулаву ва хасну ккаккан дурсса кьини инсантал кьамул баву.
Ларгсса 2016-ку шинал ваначIан бувкIун бур Ккуллал райондалул жяматрал чивчусса 74 тавакъюрал чагъар. Мукунма хасну ккаккан дурсса кьинирдай кьамул увну ур 53 инсан. ВаначIан бувкIсса чагъардал хъунмур мурадну бивкIун бур даврийн кьамул баву, къатри цалашиврий дацIан даву, къатри бансса аьрщи дулаву, материал зумунусса кумаг баву, СПК-дал давурттащал бавхIусса, ЖКХ-лул куклушивурттан хас бувсса, кIулшиву дулаврин ва цIуллушиву дуруччаврин хас бувсса, райондалийсса ххуллурдал тагьарданиясса ва цаймигу личIи-личIисса тавакъюрду.
Райондалул бакIчиначIан чивчусса тавакъюрду бур: Ккулату – 14, Ваччату – 10, ЧIяту – 8, 1-мур ЦIувкIрату – 5, ЦIуйшату – 4, Вихьлияту – 7, Хъювхъату – 3, Хъусращату – 8, СумбатIлияту – 7. Циняв цачIанма бувкIсса чагъардан жавабру дуллуну дур ва кьамул бувай кьинирдай бувкIминнал тавакъюрду биттур бувну бур. Райондалий биттур буван къахъанахъисса масъаларттал ялувгу хIадур бувну бур цайми идарарттайнсса чагъарду.
ХIажимурад ХIусайнов
