Дагъусттаннал машлул ва промышленностьрал палаталул
президент Бадруттин МахIаммадовлул ва
УФСИН-лул хъунама Муслим Даххаевлул икьрал дунни

Машлул палаталул ва дуснакьрал дянивсса икьрал

Дагъусттаннал машлул ва промышленностьрал палаталул президент Бадруттин МахIаммадовлул ва УФСИН-лул хъунама Муслим Даххаевлул икьрал дунни кIивайннанмагу мюнпатну хIала-гьурттуну зун, УИС-рал идарарттай ишбажаранчишиву чялиш ду­ккан дан ва мунийну дуснакь бувми захIматрахун бичаврил хIакъиравусса закондалул тIалавшиннарду щаллу дан. Машлул ва промышленностьрал палаталул ва УФСИН-лул хъуниминнал дурсса икьраллал мурад бур республикалул УИС-рал идарарттай производство щирикIин даву. Ва масъала щаллу бан кIирагу организациялун, цаннащал цаннал маслихIат ккак­лай, цачIусса давурттив дуллай зунсса пикри бур.

ХIурматрай тIайла увккунни

Силистталул 2-мур изолятордануву хьунни чIярусса шиннардий республикалул уголовно-исполнительный системалий зий хъунмасса захIмат бивхьу­сса Платхан Салахов пенсиялийн тIайла уклакисса шадлугърал мажлис. Изоляторданул хъунама, виваллил службалул подполковник Аьрип ХIажиевлул щалагу коллективрал цIания Платхан Салаховлухь ва бигьа ба­къасса къуллугърай зий бивхьусса захIматрахлу барчаллагьгу увкуну, чIа увкунни цIуллушиву.
— Умуд бур, жула идаралул Ветерантурал советрал член хIисаврайгу, ванал жула давриву чялишсса гьурттушинна дулланссар тIисса, — увкунни Аьрип ХIажиевлул.
Платхан Салаховлулгу, идаралул каялувчитурахь ва архIал зузиминнахь барчаллагьгу увкуну, цува жагьилсса зузалтран кумаг бан, опыт кIибачIин хIадурну ушиву бувсунни.
Идаралул аьдатрайн бувну, Платхан Салаховлун коллективрал чулуха дакIний личIансса бахшиш дунни.

ЦIарая мюхчанну личIан

Дагъусттаннал УФСИН-лул зузалтращал хьунабавкьунни МЧС-рал вакилтал. Управлениялул зузалтращал хьунабакьин бувкIун бия ялув бацIаврил ва профилактикалул даврил отделданул (№1) хъунама инспектор Ёнжаги ХIамзатов ва Щалагу Аьрасатнал хушрайсса цIу лещан дайсса обществолул председательнал хъиривчу Мариян Мустапаева. Вайннал кIул бунни Управлениялул зузалт Дагъус­ттаннай цIу ларчIсса иширттал статистикалущал, бувсунни цIарая мюхчан хьунсса чаранная.
Управлениялул хъунаманал хъиривчу Аьликьади МахIам­мадовлул барчаллагь увкунни хъамаллурахь мюнпат бусса маслихIатирттахлу.

Дуснакьлувтал хьунабавкьунни гъан-маччанащал

ТIайла бацIан баврил 7-мур колониялий хьунни «нузру тIиртIусса» кьини. Закондалийн бувну, дуснакь бувминнаща цала гъан-маччанащал хьунабакьин бюхъайссар шинай мукьийла. Му кьинирив тIурча, вайннаща хьунабакьин бюхълахъиссар цал ялагу. Му хьунабакьавугу дуснакьравуминнал лайкь дуллай бур цала захIматрайну ва шиккусса низамрайн мютIишиврийну.
Хъамаллуран ккаккан бунни общежитияртту, медициналул кабинетру, столовая, цехру. Цала гъан-маччами бучIансса кIулну, дуснакьравумигу хIарачат буллан бикIай марцIшиву дуруччин. Ва ххуллухь колониялийн бувкIми бивунни 6-мур кьюкьлувун. Колониялул хъунаманал хъиривчу, виваллил службалул полковник Залбек МахIаммадовлул кIицI лавгунни цалчин колониялийн бувкIсса дуснакь бувминнал гъан-мачча шиккусса шартIру ккарккун махIаттал хьуну бикIайшиву.
— КьатIувминнан дуснакьрай укунсса къулайсса шартIру душиврия хавар къабикIай, — тIий ур ва.

Прокурор ялту увккунни

Цалчинмур силистталул изолятор ххал бигьин увкIунни республикалул прокурор, 2-мур классрал юстициялул советник Рамазан Шагьнавазов.
Ванащал архIал бия Да­гъусттаннал УФСИН-лул хъунама, виваллил службалул генерал-майор Муслим Даххаев, ванал хъиривчутал Юрий Суздальцев ва Аьли­кьади МахIаммадов, 1-мур изоляторданул хъунама, виваллил службалул подполковник Рауф ХIабибов, Управлениялул хъунаманал кумагчи, виваллил службалул подполковник Рашид Зайнулаьбидов, республикалул прокурорнал хъунама кумагчи МахIаммад Залбеков, республикалул прокурорнал хъунама кумагчи Татьяна Голубова, респуб­ликалул прокурорнал кумагчи Азим Караев.
Рамазан Шагьнавазовлул ххал дунни идаралул отделенияртту, дуки-хIачIия дусса кIанттурду ва карцерданул къатри.
Камерарду ххал буллали­сса чIумал, дуснакь бувминнаву ба­къая багьу-бизулул шартIирдая, медициналул дузалшиндарая аьрзирайсса.
Закондалул тIалавшиннарду къадурурччусса кIанттурдугу идаралий хьунакъабавкьунни. Идаралул къатри ххал дурну махъ Рамазан Шахнавазовлул кьамул бунни дуснакь бувми.

Теннисрай буккаврил бяст-ччал хьунни

Апрель зурул 6-сса кьини щалагу дунияллий настольный теннисрал кьинину баян бувну бур. Мунин хасну апрель зурул 1-нния 5-ннийн бияннин Да­гъусттаннай нанисса теннисрал фестивальданий гьуртту хьунни Дагъусттаннал УИС-рал идарарттугу.
7-мур ва 2-мур исправительный колониярттаясса 120 инсаннаща ва фестиваль нани­сса гьантрай ккаккан бан бювхъунни цала бюхъу-хъит. Идаралул яла хьхьичIунма теннисрай укку тIисса цIа ласунсса бяст-ччал ягинсса бия, хьхьичIунсса кIанттурду бугьан бигьану ба­къая.
ТIуркIурду къуртал хьуну махъ дунни хIасиллу: 2-мур колониялий цалчинсса кIантту бувгьунни Р. Исмяиловлул, кIилчинсса – Р. Гюлметовлул, шамилчинсса – Д. Багадовлул; 7-мур колониялий цалчинсса кIану бувгьунни М. МахIаммадовлул, кIилчинсса – Р. Хасаевлул, шамилчинсса – Ю. МахIаммадовлул.
ХьхьичIунсса кIанттурду бувгьуминнан ва бяст-ччалливу гьурттушинна дурминнан бахшишру дантIий бур идаралул администрациялул чулуха.

Дуснакьрал школалул дуклаки оьрчIал хьхьичIунсса кIану бувгьунни

Терроризмалул идеологиялийн къарши бацIаврил давур­ттал лагрулий 2016 шинал ноябрь зурул 3-нния 25-ннийн бияннин Дагъусттаннал КIулшивуртту дулаврил ва элмулул министерствалий хьуссия Аьрасатнал ва Дагъусттаннал лишандалул (символикалул) тарихран хас дурсса «И гордо реет флаг державный» тIисса ахттаршиннардал ва творчествалул давурттал республикалул конкурс.
Конкурсрайн дуркIун дия республикалул 10 шагьрулия­сса ва 35 райондалиясса 450 даву. Миннувух дия дуснакьирттайн бавкьуминнал давурттугу. Конкурсрал дия шанна номинация: «Декоративно-прикладное творчество», «Литературалул творчество», «Хъирив бизаврил даву».
Цалчинмур номинациялий, кIилчинсса кIану бувгьунни 2-мур тIайлабацIан баврил колониялийсса, Шамхалтерменнал хьхьувайсса школалул 11-мур классрал дуклаки оьрчI Сайпуллаевлул. Вай гьантрай исправительный колониялий ванан буллунни 2-мур даражалул диплом.

Аварияртту чIяру шаврицIун бавхIуну

Республикалул ххуллур­дай чIярусса аварияртту хъа­нахъаврицIун бавхIуну, 2-мур тIайлабацIан баврил колониялий хьунни ГИБДД-лул вакилтуращалсса хьунабакьаву. Колониялул зузалтращал хьунаакьин увкIун ия ГИБДД-лул управлениялул хъунама инспектор, полициялул хъунама лейтенант Руслан РахIимов. Ванал бувсунни УИС-рал зузалт­рахь ххуллул низамраву хьу­сса дахханашивурттая. Ихтилат хьунни ДТП-тту къахьун­сса, аьрххи-ххуллурдай оьрчIру мюхчан бансса чаран лякъаврия. Полициялул зузалал мукунма бувчIин бунни хIукуматрал хIаллихшиннарду электрон журалий ишла дансса куц.
Ванал бахшиш бунни колониялун ххуллурдай мюхчан шаврил хIакъиравусса пособиярттугу.

Тархъаншиврийн бувккун махъгу

Закондалийн бувну, дуснакьирттай бивкIминнал ялув бацIаву дайссар органнал вай тархъаншиврийн бувккун махъгу. ХьхьичIва-хьхьичI органнал къулагъасралу буссар дуснакьравусса низамрайн мютIи къа­хъанай бивкIми, кIусса тахсиркаршивуртту дурми ва кIилчин-шамилчин танмихIрайн кIункIу бувну бивкIми. Мукун ххишалану ялув бацIаврил хIакъиравусса бувчIин бавуртту дан, 9-мур колония-поселениялийн бувкIун бия Виваллил иширттал министерствалул вакилтал.
Шичча итабакьин чIун гъан хъанахъиминнащал хьунабавкьунни Къизилюртуллал муниципаллал дянивсса отделданул инспектор, полициялул чIивима лейтенант СалихI ХIасанов ва полициялул участокрал вакил, хъунама лейтенант Хизри Кьурбанаьлиев. СалихI ХIасановлул бувсунни вайннахь дуснакьрава бувккун махъ цивппа ялапар хъанахъисса кIанттурдай сияхIрай бацIаврил низамрая, чIумуй сияхIрай къабацIарча, хьунадакьинтIисса захIматшивурттая. БувчIин бунни дуснакьрава бувккун махъгу цаппарассаннан виваллил иширттал органнал итталу би­кIан аьркиншиву, судрал чулухагу вайннан ца­ппарасса ссу­ссукьушиннарду дикIантIишиву. Масала, виваллил иширттал отделданийн регистрациялийн бучIан баву, цаппара­сса кIанттурдайн буккан къадагъа дишаву, ккаккан був­сса кIанттурдая чунмайкIуй гьан ихтияр къадулаву.
Дагъусттаннал УФСИН-лул пресс-служба
ХIадур бувссар
А. Аьбдуллаевал