Апрельданул 17-нний МахIачкъалаллал бакIчи М. МусаевлучIа хьусса батIаврий ихтилат хьунни майрал байрандалул хьунийн­сса хIадуршиндарая.

З. АьбдурахIманова
БатIаву тIитIлай, шагьрулул бакIчинал кIицI бувунни Интнил ва ЗахIматрал кьинилул ва Ххувшаву ларсун 72 шин хъанахъисса байраннал хьунийн ттинин дуршиву хъунисса давуртту: бувгьуну бур мурхьру, къатIри, тIутIив, бакьин бувну бур ва буллайнма бур кучарду, ххуллурду, халкьуннансса тротуарду, дуллай сукку хьун тIий бур кIичIиртту чIюлу бансса давурттив.
Бувсунни апрельданул 29-нний Дагъусттаннал хъуншагьру гьур­тту хьунтIишиву щала Аьрасатнан аьмсса субботникравух. Майрал 1-нний шагьрулул личIи-личIисса кIичIирттаву щурунтIиссар концертру ва цаймигу тяхъашивуртту. Оьруснал театрданул хьхьичIсса майданнив хьунтIиссар дуклаки оьрчIру, студентътал, зузалт, пишакартал, профсоюзирттал ва личIи-личIисса сакиншиннардил вакилтал гьурттусса хъуннасса шадлугърал батIаву. Мура кьини Р. ХIамзатовлул кучалий, личIи-личIисса творчествалул коллективру, магьирлугърал пишакартал гьурттусса, «Ккавкказ – ца кулпатри» тIисса фестиваль тIитIинтIиссар. Мура кьини шагьрулул хъун кучалийх гъинттул чIумал, Ярагъскийл кучалия, Дахадаевлул цIанийсса кучалийн бияннин, халкь бахьтта сайрданий занантIисса аьдатгу цIакь дантIиссар. Шикку шагьрулул халкьуннансса ва жучIанма бувкIсса хъамаллурансса тяхъашивуртту, бигьалаган-щябикIансса шартIру дузал дантIиссар.
Шагьрулул бакIчинал хъиривчу З. Алхасовлул чIурчIав дурунни Ххувшаврил кьини нантIисса шадлугъирттайгу. Байран ва кьини дайдишинтIиссар хъун майданнив хьунтIисса хъуннасса парадрая. КIул акъасса саллатIнал гьайкалданучIа ва саллатIтурал хIатталлив тIутIал шалкри бивхьуну махъ, Родопуллал парк­раву, Р. ХIамзатовлул цIанийсса кIичIираву личIи-личIисса шадлугъру, тяхъашивуртту нантIиссар.
М. Мусаевлул кIицI бувунни шагьрулуву ми мероприятияртту наниссаксса хIаллай халкьуннал мюхчаншиврул давугу гужлан дуван аьркиншиву. Мукунма ххал бивгьунни шагьрулувусса щинал ва цаймигу агьамсса масъалартту. БакIчинал бусаврийну, гьашину шагьрулул ххуллурдал 75% бакьин бан тIий бу­сса бур.