Мартрал 27-нний Ккуллал райондалий Ваччиял шяравусса ЧIунлахъиялул центрданий хьунни, шяраваллал культуралул къатрал Театрданул кьинилийн хас бувну, пьесардавасса бутIри ккаккан буллалисса шадлугъ. Ва шадлугъ-байран хIасул дурну дия конкурс хIисаврай. Конкурсрай гьуртту хьуна Хъусращиял, Ккуллал, ЧIяйннал, Хъювхъиял, Вихьуллал коллективрду.
Хъусращиял коллективрал ккаккан бувна «Председатель» тIисса пьесалувасса бутIа.
ЧIяйннал коллективрал ккаккан бувуна «ТIабиаьт ва аьдат_ру» тIисса шяраваллил оьрмулул кьинирдавасса бутIа.
Хъювхъиял коллективрал ккаккан бувуна «Ласнал нину» тIисса пьесалувасса бутIа. Шикку кIицI буван ччива адаминал роль дургьусса Хъювхъиял шяраваллил культуралул къатлул директор Оьмаева Рукьижат. Ванил мукун ххуйну роль дургьунахха, профессионал артистнал кунмасса ихтилатгу, сахIналийсса суккутIавугу дия.
Вихьуллал коллективрал ккаккан бувуна шяраваллил оьрмулувасса, «Хъюнил чIирай бя мабушларда» тIисса пьеса.
Конкурсрал ахирданий, гьуртту хъанахъими чансса бушаврийн бувну, вайннал бувсса хIарачатгу чIалай, жюрилул буллуна укунсса кIанттурду: Хъусращиял ва Ккуллал пьесардан – цалчинмур, ЧIяйннал ва Вихьуллал пьесардан – кIилчинмур, Хъювхъиял театрданун – шамилчинмур кIанттурду.
