Апрельданул 18-нний Дагъусттаннал БакIчи Рамазан АьбдуллатIипов гьуртту хьунни «Ставрополлал улклул ва Дагъусттан Республикалул регионнал дянивсса хIала-гьурттушиву Ухссавнил Ккавкказнаву миллатирттал мюхчаншиврул гарант хIисаврай» тIисса «ккуркки столданий». БавтIминнахь аьла-ссалам буллай, Рамазан АьбдуллатIиповлул бувсунни «ккуркки стол» сакин бувну бушиву Ставрополлал улклуй Да­гъусттаннал Кьинирдал лагрулий.

«ЦIанасса геополитикалул тагьарданул Дагъусттан хьун бувну бур Аьрасатнал кьиблалул форпостну, цанчирча ванил дазу дур 5 илкинсса билаятращал, мунийн бувну Дагъусттаннал паччахIлугърал политикагу дикIан аьркинни му иширан хасъсса», — увкунни ДР-лул БакIчинал.
Рамазан АьбдуллатIиповлул бувсунни цалий бацIаврил экономикалул ва социал фактордал ляличIисса мяъна душиврия. «Мунийн бувну жулла давурттаву жу чул бищарду укунсса иширайн: миллат­рал мюхчаншиву щаллу даврил стратегиялул мурадну хъанахъи­ссар экономика лядуккан даву, га цIусса технологиялул даражалийн лахъан даву, оьрму ххуй бан­сса шартIру дузал даву, виваллил ва кьатIаллил нигьачIавурттайн къарши бацIаву. Билаятрай цалчин жу зузи дурссар проектрайнусса управление. Исполнительный властьрал органнал давурттаясса мюнпатран хасну жу 56-муния лавхъссару 17-мур кIанайн», — увкунни Рамазан АьбдуллатIиповлул.
Региондалул каялувчинал бувсунни мукунма, республикалий системалийнусса даву сакин даврийну инсантал хьхьичIва кунма чIявуну лаглай бакъашиву дазул кьатIув ярагъуннищал­сса къалмакъаллал зонардайн ва жагьилтал лихълай бакъашиву бандитътурал кьюкьравун.
Ставрополлал улклул миллатирттал ва къазахъшиврул (ка­зачествалул) иширттал комитетрал председательнал хъиривчу, Терекуллал аьралуннал къазахътурал обществалул атаман Александр Журавскийл бувсунни Дагъусттаннал паччахIлугърал властьрал органнал ва Ставрополлал къазахътуращал­сса хIала-гьурттусса давурттая Аьра­сатнал кьиблалийсса дазурдацIух социал цалий бацIавуртту цIакь даврил бутIуву. Ставрополлал улклуй­сса Дагъусттаннал вакил Аьбдуллагь Оьмаровлул бувсунни регионнал дянив уртакьсса давуртту дуллай бушиврия ва СКФО-рал кIивагу субъектран ми давурттая­сса мюнпатрая.
«Ккуркки столданий» ххал бивгьунни Ухссавнил Ккавкказнаву миллатирттал дянив арарду гъан даврин хасну жагьилтурал бугьлагьисса кIанттурдал хIакъиравусса масъаларттугу.
«Ккуркки столданул» ахирданий Рамазан АьбдуллатIиповлул ДР-лул Жагьилтурал иширттал министерствалийн тапшур бунни 100 жагьилсса инсаннайн оьвчин Дагъус­ттаннай бигьалаган.

ХI. Аьдилов