Щалагу Аьрасатнаву интнил каникуллал чIумал дувай ОьрчIал луттирал нюжмар. Ва даву гьарца шинал лахъа-хъунну кIицI лагай Каспийскалийгу. Ва ххуллухгу ОьрчIал луттирал нюжмар тIитIлатIисса шадлугъ хьуна шагьрулул Хъунмур библиотекалий.Бадрижамал Аьлиева
Мунивух гьуртту хьун бувкIун бия шагьрулул школарттаясса чIава буккулт, шагьрулул администрациялул, ДР-лул Чичултрал союзрал вакилтал.
ОьрчIру луттирал байрандалущал барча бунни ЦБС-рал директор Таиса МахIаммадовал. Ванил кIицI лавгунни ва байран Каспийскалий 30-ллихъайсса шиннардил лахъишиврий дуллай бушиву. Ва шадлугъ дуллай бивхьусса хъунмасса захIматрахлу, чIярусса шиннардил мутталий давриву дакI дирхьуну зузаврихлу ХIурматрал грамота дуллунни ОьрчIал библиотекалул директор Галина Иранпур-Зайналован.
БавтIминнал хьхьичI мукунма махъру лавхъунни Дагъусттаннал халкьуннал шаэртал Ссугъури Увайсовлул ва Аминат Аьбдулманаповал, шагьрулул администрациялул бакIчинал хъиривчу Людмила Левицкаял. Библиотекалувун заназисса хьхьичIунсса буккултран дуллунни грамотартту ва ххаллилсса луттирду, мукунма республикалул ва билаятрал лагрулий хьусса личIи-личIисса конкурсирттай ххув хьусса оьрчIан буллунни дипломру.
Ва кьини чIава буккултрачIан хъамалу бувкIун бия Дагъусттаннал паччахIлугърал ссихьрал театргу.
