Апрельданул 25-нний Дагъусттаннал БакIчи Рамазан АьбдуллатIиповлул каялувшиврулу хьунни республикалий аьдлу-низам (правопорядок) щаллу даврил Координациялул совещаниялул батIаву.
Ххал бивгьунни майрал байранну дуллалисса чIумал республикалийсса федерал, исполнительный властьрал ва кIанттул цилакаялувшиврул органну хIала-гьурттуну зузаврил масъалартту.
Р. АьбдуллатIиповлул бувсунни байраннал гьантрай инсантурал мюхчаншиву дуруччаврил ляличIисса агьамшиврия, мунияту му масъалалух хъуннасса къулагъас дуван аьркиншиву.
«Хаснура аьдлу-низам щаллу дуван аьркинссар Ххувшаврил Кьинилул шадлугъирттал чIумал. Ттун ччай бур лаизан циняв дагъусттанлувтурайн: агарда жунма ччай бухьурча паракьатну ва лайкьну оьрму бутлан, аьркинссар оьрму бутлан бавкьуну ва лайкьну. Жу 4 шинал лажиндарай жула чулуха жущава шаймур буллай буру. Цуксса хIайпнугу, ми шиннардий жува тамансса погоннавусса ва паракьатну ялапар хъанахъисса инсантурацIа хьуру. Жущава бюхълай бур личIи-личIисса журардал бандитътурацIа ххассал хьун, амма паракьатсса Дагъусттан цаппарассаннан иттав къалану бур. Му давривугу жунма кумаг буллай бур федерал центрданул.
Ттун кIулли цуксса захIматсса даву дуссарив дальнобойщиктурал. МукьцIалла тонна дусса хъус духхай машинарттал хъунмасса заралгу биян буллалиссар ххуллурдан. Му заралгу лахъан аьркинссар. «Платон» системалул кумаграйну паччахIлугърал так лахъаву дуллалиссар ххуллул къуллугъирттан хьусса заралданул. Му система щурущи дуллантIиссар хIалли-хIаллих тIий.
Коорупциялул хIакъираву бусан ччай бур укунсса зат. ЧIявуми инсантуран ччай бакъар мунищал талан. Ялунгума миннал хIарачат буллай бур му темалий цанна кьюркьусса авторитет дуван. На баян буллай ура, жу власть марцI дуллай буру коррупциялуцIа, министртурал ва миннал хъиривчутурал даражалий инсантал цалва къуллугъирттацIа хьуссар, миннал деларду дуллуссар ихтиярду дуруччай органнахьхьун. ХIакьину му даву гужлан дурссар», — увкунни Дагъусттаннал БакIчинал.
ДР-лул виваллил иширттал министрнал хъиривчу Сергей Карповлул бувсунни байраннал гьантрай нигьачIаву яла гьан дансса давурттаяту. Ганал бусаврийн бувну, властьрал циняв даражардал органну хIала-гьурттуну зузаврин хасъсса штабру сакин бувну бур, муниципал сакиншиннардащалсса дахIавуртту дузал дурну дур.
«МахIачкъалалив Яруссаннал театрданучIа дан тIий дур шадлугърал митинг, шагьрурдай хьун тIий дур «БивкIу бакъасса полкирал» демонстрацияртту ва заназавуртту. Миннуй гьуртту хьун тIий бур 350 азараксса инсантал. Ми циняв нигьачIаврия буруччаву мурадрай ихтиярду дуруччай органну гужлан дурсса низамрай зунтIиссар», – увкунни Сергей Карповлул.
ДР-лийсса МЧС-рал ГУ-рал хъунаманал хъиривчу Олег Халиловлул бувсунни майрал байраннал гьантрай цIу дагьавриясса мюхчаншиву щаллу даврил хIакъираву.
Хъуншагьрулул агьали нигьачIаврия мюхчан баврил хIакъиравусса ихтилат бунни шагьрулул бакIчи Муса Мусаевлул.
БатIаврий ихтилатру бунни мукунма ДР-лул дуккаврил ва элмулул министрнал хъиривчу Шираьли Аьлиевлул, ДР-лул цIуллушиву дуруччаврил министр Танка Ибрагьимовлул, ДР-лул прокурорнал хъиривчу Сергей Беляковлул.
БатIаврил хIасиллу дуллай, Дагъусттаннал БакIчинал увкунни: «ХIакьинусса батIаврий ххал бигьлагьисса масъаларттал агьамшивугу хIисавравун ларсун, укунсса батIавуртту дуван аьркинссар циняв районнай ва шагьрурдай».
ХIадур бувссар ХI. Аьдиловлул
