Ссал хъамаитава, арс !
Нязанний ухлавгсса арснал
Мухтардул аьпалун
Жул къатлуву лавхъ чирахъ,
Оьрмулул дязанниву
ЛухIи буран бивщуну,
Абадлий лещан бунни.
Щюлли марщай хъя кусса
КIяла магьилул хIави,
Мархлува цIакьну буна,
Дянива кIигъавгъунни.
Щиха лащан айссара,
Ссал хъамаитайссара,
Ттул бюрний, ттул ххазинай,
ХIайп, вил жагьилсса оьрму.
Агь, ттул баргъгуй, ттул барзгуй,
Мякьлин хIачIай щаращий,
Цир утти на бувайсса,
Щийнни леххаву чайсса!
Гьарца мудан нузахун
Вих хьун къаччисса яру
Ялугьлайнма бухьурча,
Цукун зана битави!
Вил нину, ш. ЦIуссаккул
Ссамадлул арс Аьлишаев ХIажи
Уттигъанну оьрмулул 87 шинаву аьпалухьхьун лавгунни жяматрангу бусравсса, дакI-аьмал хъинсса, ххаллилсса зунтталчу, ЧIурттащиял шяравасса Аьлишахъал ХIажи.
Увну ур ХIажи ЧIурттащиял шяраву 1930 шинал.
Ликкурай ацIайхту, буттащал архIал Къабардиннавун лавгун ур. Хъунмур ссищал Азирбижаннавунгу ивну ур, маэшат буллай. Кулпат бувну махъ шяраву уссия, ятти-гъаттараха, шяраваллил хозяйствалуха зий. Ия кару мусилсса усттаргу, ванал къадайсса даву дакъассия. Шяраваллил агьулданун ХIажи ка къаччуччин къяцIану ия. Шяравугу, лагмащархъайгу ХIажинал къадирхьусса магъив хъинну чанссар. ИчIура гъаргъмур лачIун дангу, зия хьумур дазингу леххаву ХIажинайн дикIайва, даймургу украя дайсса. Так инсаннал чIарав ацIан хьурча, хъинбала бан хьурча, гьану икIайссия.
Ия хъинну инсантуращал хIал бавкьусса — щала щарнил ХIажи-усса. Дурккусса акъая, къуллугъчи акъая, амма инсаншиврул, хъиншиврул, дакI-аьмал тIитIаврил хъунмасса бутIа буллусса ия, мунихтуну ХIажи тамур дунияллийн тIайла уккангу укъавкIсса къаливчIунни лагмащархъаягу, шагьрурдаягу. Лавгунни ХIажигу, шяравалугу дачIра хьунни.
Оьрмулул 87 шин хьуннингу ца-ца бакъа къаличIай. Оьрмулул увччуну лавгунни учин бучIия, амма 35 шинаву ивкIусса арснал кьурчIисса кьуру хIавчIун къаивкIссания. Инсан лагай, цIа кьаритай. Кьариртссар ХIажиналгу ва дунияллий ххуйссия, хъинссия тIисса цIа.
ХIажи аьпалул шаврил хъуннасса кьурчIишиву кIидачIлай, жижара буллай буру кулпатрахь, оьрчIахь, уссурссуннахь, гъан-маччанахь, щалагу агьлу-авладрахь. Цал рухI хъинний дишиннав, алжаннул ххари аннав, гьав нурданул дуцIиннав. Аммин!
ЧIурттащиял жямат
ХIаммал арс Рамазанов Бадави
Вай гьантрай лайкьну оьрмугу бувтун, лайкьсса наслугу кьабивтун, 87 шинаву аьпалухьхьун лавгунни Бархъаллал шяраватусса ХIаммал арс Рамазанов Бадави. Увну ур Бадави 1930 шинал Бархъаллал шяраву. Ччяни нинугу диркIуну, тай дяъви байбишин хьхьичIсса шиннардий, чIявуми та заманнул оьрчIан кунма, ванангу ккаши-мякь бухIан багьну бур.
ЧIивисса оьрмулий хъуниминнащал архIал колхозраву зий ивкIун ур, школалийгу дуклай. 1946 шинал Бархъаллал школалий 7 классгу къуртал бувну, увкIун ур дуклан Буйнакскаллал зунттал оьрчIансса интернатрайн. Мунияр махъ увххун ур Буйнакскаллал педучилищалувун. Училищалул ца курс къуртал байхту, зун ивкIун ур Лувмур Жунгутайливсса детдомрай. КIира шинай микку тарбиячину зийгу ивкIун ур, Бадави цIунилгу дуклан увххун ур, утти – Буйнакскаллал шяраваллил хозяйствалул механизациялул школалийн. Мугу къуртал бувну, лавгун ур зун ЦIумадиял райондалийсса ГЭС-райн, хъунама электромонтерну. Микку зий унува, дянивмур даражалул кIулшиву ласуншиврул, занан ивкIун ур ЦIумадиял школалийн. Вай шиннардий ялун лирчуну дур ванал кьянкьасса хасиятгу, бюхъу-бажаргу. ЧIирисса чIумул дянив ЦIумадиял райондалийсса 14 шяравун чани бувцуну бур Бадавинал. 1955 шинал ЦIумадиял райком партиялул тIайла увккун ур Бадави Агъваливсса банкрал отделениялийн кредитирттал инспекторнал къуллугърайн. ЦIусса даврийгу ванал ккаккан бувну бур цала пишакаршиврул даража. Шичча ва тIайла увккун ур Къарабудахккантуллалмур отделениялийн. Му ппурттуву Бадави увххун ур Ростов-на-Дону шагьрулийсса Щалагу Союзрал финансирттал ва экономикалул институтравун.
1958 шинал ивтун ур ПаччахIлугърал Банкрал Сергокъалаллал отделениялул хъунаману. Бархъаллал школалул хъунмур никирал учительтурал таний Бадавинал кабакьу бувну Сергокъалаливсса педучилище къуртал бувну бур. Ванал кумаграйнур жуя учительтал хьусса тIий, ми хIакьинусса кьинигу барчаллагьрай бур ванайн. Сергокъалалив Бадави зий ивкIун ур 40-нния лирчусса шиннардий. Сергокъалаллал жяматрал ванайн «жула лаккучу» учайсса бивкIун бур.
Госбанкрал управляющийну, яла РКЦ-лул хъунаману зузисса шиннардий Бадави лайкь хьуну ур республикалул ва райондалул чулухасса наградарттан, хIурматрал грамотарттан. 1987 шинал ванал каялувшиву дуллалисса Госбанкрал отделениялул СССР-нул циняв банкирдал дянив цалчинсса кIану бувгьуну, Союзрал Госбанкирдаву яла хьхьичIунмурну ккалли бувну бур. 1998 шинал Бадавинан дуллуну дур «Дагъусттаннал лайкь хьусса экономист» тIисса бусравсса цIа.
Цала кулпат ПатIиматлущал Бадавинал ххаллилну тарбия бувну бур кIива душ ва шама арс. Ванал хъунама арс Нурулислан аьралуннал полковникри, ЯтIул ЦIукул ордендалул кавалерди. Къуллугъ буллай ивкIссар Авгъаннаву. Давди тIима арснал ЯтIул дипломрай къуртал бувну бур Дагъусттаннал педагогикалул университет, ларсун дур элмурдал кандидатнал цIа. ЦIана ва зий ур Дагъусттаннал университетраву уголовный праволул ва криминологиялул кафедралул доцентну.
Бадави аьпалул шаврил кьурчIишиву кIидачIлай, жижара буллай буру кулпатрахь, оьрчIахь, оьрчIал оьрчIахь, уссурссуннахь, махъсса гъан-маччанахь. Имандалий лавгун лякъиннав, рухI алжаннул ххари даннав.
Бархъаллал
ва Сергокъалаллал жямат
ДакIнийхтуну хъуннасса кьурчIишиву кIидачIлай, жижара буллай буру,
Закарижанал арс Сутаев Султи
жуятува личIи шаврийн бувну, ванал уссурссуннахь, гъан-маччанахь, агьлу-авладрахь, цинявннахьвагу. Цал рухI хъинний дишиннав, Алжаннул ххари аннав. Махънал оьрмурдай барачат бишиннав.
Ина жун мудангу дакIний личIантIиссара.
СумбатIуллал жямат
Хъуннасса кьурчIишиву кIидачIлай, жижара буллай буру ГьунчIукьатIрал къутандалий яхъанахъисса
Исяев Аьбдуразакь ИсямахIаммадлул арс
чIун дакъа аьпалувух ишаврийн бувну ванал кулпатрахь, оьрчIахь, уссурваврахь ва махъсса гъанчунахь.
Аьбдуразакьлун къабуллумур оьрмулул бутIа ваная бивзминнан булуннав Заннал.
Махънал оьрмурдай барачат бишиннав.
Амин Аьбдуллаев ва ванал кулпат
