Давриву бикIу, дуккавриву бикIу хьхьичIунсса лакку оьрчIая ва душваврая бавукун, жу дакIнийхтуну ххари шару, жула буккултрахьгу минная бусан анавар буккару. Исламрал институтраву ххуйсса кьиматирттай дуклакисса, хьхьичIунсса студенткан ккалли­сса лакку душния бавукун институт­раву дарс дихьлахьисса преподавательная, ттун мунищал кIул хьун ччан бивкIуна.

А. Аьбдуллаева
Мукьариясса Жавраиллул ва Бархъаратусса Аминатлул душ Гьарунова Ххадижат кIулминнал вания ххуйсса бакъа къаучай. Хадижат оьрмулул 13 шинаву байбивхьуну бур дин-чак дуллай. АрхIал ца классраву дуклаки­сса, чак буллалисса дусъсса душ ххуй бивзун, ниттихь чак бан лахьхьин бува тIий бивкIун бур. Душнин дин-чак дуллан, исламрал кIулшивуртту ласун ччисса бувчIукун, ниттил бувцуну бур ва диндалул ххуллу-хха ххуйну кIулсса, чIаххуврай ялапар хъанахъисса лакку щарссаничIан.
— Жула мурад бусайхту, ина душ тIайласса ххуллийх бувцуну най бура, ас-намус бусса, мяърипатрал бувччусса бикIантIиссар куна ганил рязину, кIива гьантлува чак бангу лахьхьин бувну, чак байни бутансса чIивисса бартбисугу бахшиш бувну гьан бувна, — тIий, буслай бур Ххадижатлул нину Аминат.
Ххадижат ччяни зат лаласайсса, гьарица чулухасса кIулшивуртту ласун ччисса душ бивкIун бур школалий дуклакинийва. МахIачкъалаллал 28-мур школагу къуртал бувну, ва бувххун бур Дагъусттаннал ПаччахIлугърал техникалул университетрал «Государственное и муниципальное управление» факультетрайн. Ми­кку дуклай бунува къуртал бувну бур бухгалтертурал курсру.
Курсирдайн заназисса ппур­ттуву мадрасалувун кьамул баврил хIакъиравусса баян баву ккар­ккун, бувххун бур мивунгу.
— Мадраса дачIи шинай бу­ккайсса бия. Му чIумул дянив жун аьрабрай буккингу, Кьуран тIайлану буккингу лахьхьин байва. Гихуннайсса кIулшивуртту ласун ччиминнан институтравун буххан маслихIат бувна мад­расалул преподаватель Аминат ХIамзатовнал. Мукун на бувхссара Дагъусттаннал гуманитар институтрал теологиялул факультетрайн. Та чIумал ванийн «Институт теологии и международных отношений» учайва, — буслай бур Ххадижат.
ЦIана Ххадижат магистратуралул 2-мур курсирай дуклай бур. Институтрал ляличIишиву му дур, шиву дуклакиминнан дуллай бур светский ва диндалул кIулшивуртту, куртIну лахьхьин дуллай бур исламрал кьанунну. Цалчинсса курсрая шихунмай Хадижат хьхьичIунсса студентътуравух бур. Ва бусравну бур преподавательтуран ва архIал дуклакиминнан.
Ххадижат бувххун бур институтравун щар хьуну махъ. Къатта-къушлилссагу, кIива мюрщисса оьрчIалссагу бувну, институтраву хьхьичIунну дуклан, гьай-гьай, бигьану бакъахьунссия. Амма кIулшивуртту ласунсса гъира ялтту буккайсса бивкIун бур. Ххадижат барчаллагьрай бур цинма институтравун буххан ччан бивкIукун, муницIунгу авкьуну, дуклакисса шиннардийгу мудан цинма ка-кумаг буллалисса ласнайн Идрислуйн. Барчаллагьрай бур куртIсса кIулшивуртту дуллусса диндалул философиялул преподаватель, цила магистр хьунсса диссертациялул каялувчи профессор Асият Бу­ттаевнайн.
— Асият Буттаевна цуппагу лакку инсанни. Ттула диссертация укун лавайсса даражалул преподавательнал каялувшиндаралу чичин нясив шаву ттунма бахтти хьушиврун ккалли бара, — тIий бур Ххадижат.
Гьашину Ххадижатлул къуртал бан тIий бур магистратуралул махъва-махъмур курс. Ванища бюхълай бур исрамрал тарихрал, бусурманнал ихтиярдал дарсру дишин.
ХIалли-хIаллих тIий, циняв_ппагу диндалул ххуллу-хха бартбигьлан пикрилий бур. Ва рувхIанийсса давриву ванин тIайлабацIу чIа тIий буру.