Аьрасатнаву 2017 шин Экологиялул шинну баян бувну бур. ВаницIун бавхIуну, Совет Союзрал Виричу ХIажи Бугъановлул цIанийсса Султанянгиюртуллал №2 школалий бувгьунни биялсса мурхьру, личIи-личIисса ххяххиярттал ва тIутIал къатIри.

Андриана Аьбдуллаева
Ва акциялий гьуртту хьунни Дагъусттаннал виваллил иширттал министр, генерал-лейтенант Аьвдурашид МахIаммадов, ванал хъиривчутал, отделлал хъуними, ттуршва_хъул полициялул зузалт. Вайннавух бия Къизилюрт шагьрулул полициялул хъунама, полковник ШайхмахIаммад ШайхмахIаммадов бакIчисса Къизилюртуллал отделданул зузалтгу.
Зун байбишин хьхьичI Аьвдурашид Ма­хIаммадовлул тIутIив дирхьунни школалул хIаятраву дацIан дурсса ХIажи Бугъановлул гьайкалданучIа. Акциялий мукунма гьуртту хьунни Къизилюртуллал райондалул бакIчи МахIаммад Шабанов, Султанянгиюрт шяраваллил бакIчи Рашид МахIаммадов. Ва даврил сакиншинначитал хьунни МВД-лул отделлал каялувчитал: полициялул зузалт_ращалсса даврил каялувчи Илгьам Агъаев, Автохозяйствалул хъунама МахIаммад МахIаммадов, Дагъусттаннал ВацIлул хозяйствалул комитетрал Хасавюртуллалмур хозяйствалул хъунама Багьауттин МахIаммадов. Мурхьру бувгьуну махъ, министрнал ххал бунни ХIажи Бугъановлул цIанийсса тарихрал ва краеведениялул музей, барчаллагьрал махъру чивчунни музейравун бувкIминнал цала-цала пикри бусайсса луттирай.
ДакIнийн бутан, кIира шинал хьхьичI, Хъунмасса Буттал кIанттул цIанийсса дяъвилий Ххувшаву ларсун 70 шин хъанахъисса гьантрай, Султанянгиюртуллал №2 школалий шадлугърал даражалий тIиртIуссия Совет Союзрал Виричу ХIажи Бугъановлул гьайкал. Та чIумалгу Аьвдурашид МахIаммадовлул тапшур бувну, та даврин ххуйсса кумаг був­ссия министрнал хъиривчу Сахават Сахаватив бакIчисса МВД-лул зузалтрал. Таний Аьвдурашид МахIаммадовлул махъ буллуссия школалул хIаятраву ва лагма-ялтту мурхьру ва тIутIив дугьан. Министрнал бацIан бунни цала махъ. Ххувшаврил байран гъан хъана­хъисса гьантрай ванал цала зузалтращал ва ххаллилсса даву дунни.
Бугъановлул цIанийсса фондрал правление дакIнийхтуну барчаллагь тIий буру Аьвдурашид МахIаммадовлухь, мунал хъиривчутурахь, отделлал хъуниминнахь, цинявппагу ва давриву гьурттушинна дурсса полициялул зузалтрахь Вирттаврал цIа абад дан шаймур буллай тIий, цала ххаллилсса давурттайну дуклаки оьрчIан, ялун нанисса никиран эбрат ккаккан дуллай тIий.
ЧIа тIий буру цIуллушиву, кулпатирттаву нахIушиву, давриву тIайлабацIуртту.
ХIажи Бугъановлул цIанийсса
фондрал вице-президент
Эльмурад Бугъанов