Март зурул 30-нний МахIачкъалалив хьусса Дагъусттаннал Халкьуннал Мажлисрал 8-мур сессиялий Дагъусттан Республикалул Виваллил иширттал министр Аьвдурашид МахIаммадовлул 2016 шиналсса полициялул даврил хIасиллу дунни.

А. Аьбдуллаева
— Ларгсса 2016 шинал Дагъусттаннал Виваллил иширттал министерство цайми ихтиярду дуруччай органнащал ва гужирдал структурардащал цачIу зий бия республикалий жяматийсса низам ва агьалинал ихтиярду дуруччаврил, халкьуннал мюхчаншиву дузал даврил цIаний.
Ларгсса шинал сияхIрайн ларсъсса тахсиркаршивуртту 4,5%-рал ххишала хьунни. 2015 шинал 15 азаллий 130 тахсиркаршиву сияхIрайн ларсун диркIхьурча, 2016 шинал 15 азаллий 810 хьуну дур. Аьмну тахсиркаршивуртту ашкара дурну дур 82%-рал. СияхIрайн ларсъсса тахсиркаршивуртту ххишала хьуну дур прокуратуралущал цачIу дурсса цаппарасса давурттайну, масала цинявппагу агьалинал аьрзри ва баян бавуртту сияхIрайн ласаврийн бувну.
Ларгсса шиналсса тагьар ххал дуллалийни, 100 инсаннайн 524,3 тахсиркаршиву дукIлай дур. Ва хъанай дур щалагу Ухссавнил Федерал округрайнияр 1,5-лла чанну, Аьрасатнавунияр – 2,8-лла чанну. Вара чIумул дянив 3,3%-рал чан хьуну дур кIусса, оьхIалсса тахсиркаршивуртту. Ми хъанай дур цинярдагу сияхIрайн ларсъсса тахсиркаршивурттал 26%,- бувсунни министрнал.
Аьвдурашид МахIаммадовлул мукунна жям дунни наркотикру ишакаш баврин ва экономикалул тахсиркаршивурттан ххуллу кьукьаву, балугъравун къабивминнал дянив тIулдакъашивуртту хьун къаритаву ва ххуллурдай низам дуруччаврил ялув бацIаву мурадрай полициялул отделлал дуллалисса давурттал. Бувсунни агьалинаща ярагъ машан ласаврил хIасиллая. Ларгсса шинал, Респуб­ликалул агьалинаща лавсун бур 200-ннийн бивсса ярагъ.
— Ларгсса шинал дайдихьулий «Джемикентский» пострай пIякь учаву хьуну махъ жу хъуннасса даву дарду Кьиблалул Дагъусттаннай. Цинярдагу ва даралувусса районну марцI дуккан дарду къачагътурая ва миннан кабакьу буллалиминная.
Ларгсса шинал ашкара барду ярагъ ва дуки-хIачIия лариртсса 80 кьюлтIсса кIану, 22 блиндаж, чIумуйсса лагерьду.
Къачагътураща зеххин бювхъунни 393 битай ярагъ ва гранатартту. 68 азарда патрон ва цаймигу затру. Ашкара дарду 966 террорданул журалул тахсиркаршиву.
Жун кIулссаксса, ва шинал дайдихьулийнин къачагътурал кьюкьраву уттигу бур 30-ннийн бивсса дагъусттанлувтал. Террорданиясса нигьачIаву хъуннасса дур, дагъус­ттанлувтал дунияллийсса террорданул иширттавун кIункIу буллалаврийн бувну.
1200-нния ливчусса дагъусттанлувтал бур хIакьину дунияллул террористурал кьюкьраву талай.
Гъанмур Баргъбуккавал чулий­сса тагьар даххана шайхту, ми махъунмай зана хьунсса нигьачIаву дур. Ларгсса шинал бат увссар Сириянава зана хьусса 4 къачагъ, 20 инсан увгьуссар, 38 инсаннан тихунмайсса ххуллу лавкьуссар. Аьрасатнал Виваллил иширттал министерствалиясса коллегахъащал цачIу Москавлив бувгьуссар Сириянава зана хьу­сса террористуран къалпсса паспортру буллай, бахлай бивкIсса сакиншиндарайсса тахсиркартурал группалувасса 14 инсан, — бувсунни министрнал.
Профилактикалул учет дачин даврил хIакъиравусса суалданун жаваб дуллай, ванал бувчIин бунни: Дуллалисса диндалул журалул бурувгун, сияхIрай ивхьусса цаягу инсан акъассар Виваллил иширттал министерствалий. ЖучIа сияхIрай буссар тахсиркаршиву дан бю­хъайсса инсантал. Мигума цинявппа бакъассар», — куну.