Апрельданул 8-нний Санкт-Петербурглив «Анжи» команда ччалли дурккунни Санкт-Петербургуллал «Зенитращал». Ва тIуркIу махъва-махъмурну хьунни «Зенит» командалул «Петровский» стадиондалий. Уттисса чемпионатрал тIуркIурду хьунтIиссар цIусса «Санкт-Петербург-Арена» стадиондалий.

Р. Къардашов
Цалчинмур таймрал 22-мур минутIрай «Анжи» командалул урчIамур чулуха бищун бувна гьужумрал щатIи, Адлан Каццаевлул ва Сергей Паршевлюклул биян бунни ттуп Павел ЯковлевлучIан, ганалгу ччаннах лапI учин бунни  муттаэтурал къапулувун. «Зенитрал» къапучи Луневлуща хха­ссал бан къавхьунни цала къапу.
ТIуркIулул кIилчинмур бутIул дайдихьулий «Анжилул» гьужумчи баранбал уккавай ия «Зенитрал» голкипернащал, амма цала команда голдания дуруччин ччанналун ххявхсса Николас Ломбертслул, чIиникI бивщусса куна, ххартI увну, увтунни жула ттуплий укку Паршевлюк. Судьянал му танмихIрайн кIункIу увну, уккан унни тIуркIулул майдандалия. Майдандалий «Зенитрал» 10 тIуркIучи ливчIун унагу, хIарачат бунни гол бакьин. 73-мур минутIрай Евгений Черновлул цачIанма тIайла бувксса ттуп Александр Кокориннул запI бикIан бувунни «Анжилул» къапулувун.
ТIуркIулул ялун ххи дур­сса чIумуй «Анжилуща» кIийлва хьунтIий бия «Зенитрал» къапулувун ттуп бакьин, амма, шанс дуллуну духьурчагу, муниха лархьхьусса усттаршивугу дикIан аьркинни_хха. Мурив дакъая. ТIуркIу къуртал хьунни 1:1 счетрайну.
ЦIана МахIачкъалаллал «Ан­жи» дур турнирданул таблицалул 12-мур ххуттай.
«Анжилул» хъиривмур тIуркIу хьунтIиссар МахIачкъалалив «Анжи-Ареналий» апрельданул 15-нний «Крылья Советов» командалущал.