Республикалул тестированиялул центрданул графикрайн бувну МахIачкъалалив «Труд» стадиондалий хьунни щалагу Аьрасатнал физкультурно-спортивный комплексрал ГТО-лул кьараллу ххал дигьлагьисса кIинтнил фестиваль.
Муний гьуртту хьунни Лакрал райондалий гьашину школа къуртал буллалисса 34 дуклаки оьрчIру (24 чIаважагьил ва 10 душ). Миннава ГТО-лул кьарал мусил лишандалунну тасттикь дурунни ацIуннал, урчIуннал дуллунни арцул лишандалунну. Ва фестивальданул чIалачIи бунни физкультуралул учительтуран багьлай бушиву дуклаки оьрчIал хIадуршинна гужлан дан, школарттал каялувчитуран тIурча, гужлан дан багьлай бушиву школарттай физкультуралул дарсру дишаврил даву. Фестивальданул хIасиллайн бувну, 2000 метралул манзилданий лечавриву яла хьхьичIунсса ккаккия хьун дурсса Кьубиял школалул дуклаки оьрчI МахIаммадов Рамазан гьуртту хьун тIий ур апрель зурул ахирданий МахIачкъалалив хьунтIисса 18 шин хьуннинсса жагьилтурал дянивсса Дагъусттаннал чемпионатрай.
