МахIачкъалаллал аэропортрай хьунни хIажлийн лагаврил хIадуршиннардал хIакъиравусса батIаву. БатIаврил даву дачин дурну ия авиапредприятиялул директор Арсен ПирмахIаммадов.
И. Саидова
Шикку гьуртту хьунни Республикалийсса Аьрасатнал ФСБ-лул дазул управлениялул, Дагъусттаннал таможнялул вакилтал, хIажлийн агьали ххилаххисса туристический фирмардал, Республикалул бусурмантурал рувхIанийсса управлениялул каялувчитал ва аэропортрал жаваблувсса къуллугъирттал зузалт.
Гьашину Аьрасатнава Саоьдуллал Аьрабусттаннайн хIажлийн гьан 20 азара инсаннансса квота ххишалану итадаркьуну дур. Миннава Дагъусттанная хIажлийн гьантIиссар 8 азара инсан.
БатIаврий бувсунни таможнялул ва дазул кьатIувсса ххал бигьавуртту цукун ва цими гьантлул мутталий дуван ккаккан дурну дуссарив. Мукунма бувсунни хIажлийн агьали цуми самолетирттай ххилан най буссарив.
Ва батIаврий цаппарасса маслихIатру ккавккунни хIажлил даву сакин дуллалиминнан. ХIажлийн лагаврил хIадуршиннардал хIакъиравусса масъалартту гьарта-гьарзану ххал бигьинтIиссар гихуннай хьунтIисса батIавурттайгу.
