Аьдатравун дагьну дур личIи-личIисса къуллугъирттал идарарттай гьарца ялун нани­сса шадлугърал ягу цамур мяъна-мурадирал байраннал хьунийн­сса батIавуртту. Гьашинусса шин жула билаятрай Экологиялул шинну баян бувну духьувкун, цIанара дайдирхьуну дур шагьрулул школардай ва библиотекардавугу ва иширан хасъсса батIавуртту. Ца мукунсса батIаву уттигъанну хьунни, чIаравсса №37-чинсса школа-гимназиялул дуклаки оьрчIругу гьурттусса, МахIачкъалаллал ЦБС-рал №2-чинсса библиотекалий.
З. АьбдурахIманова
БатIаву хас дурну дия, Экологиялул шинан дакъа, билаятрал заповедникирттал системалун 100 шин хъанахъисса иширангу.
«ТIабиаьт – жула дус» тIисса темалун хасъсса ихтилатраву библиотекалул зузалтрал оьрчIахь бувсунни шиная шинайн дунияллул тIабиаьтраву хъанахъисса дахханашивурттая, нигьачIишивурттая, бухлаглагисса жанаварт-лелуххантрая, уртту-тIутIая. Бувсунни мукунма ЯтIул луттиравун лавсъсса, бухлаган бюхъайшиврул нигьачIишиврулусса лелуххантрая, жанавартирттая ва уртту-тIутIаягу, ми духлаган къаритан экологтурал бартбигьлагь­сса ххуллу-ххуттая. Бувсунни жула Дагъусттаннайсса заповедникир­ттая ва заказникирттаягу, шиккусса ххяххиярттая ва жанавартирттая. Ихтилатирттая махъ дурунни «Дуручча вилла планета!» тIисса викторина ва экологиялул кроссворд.
Библиотекалул хъунмур залдануву зузалтрал мукунна хIадур дурну дия «Аьзизсса тIабиаьтрал авуршиву», «SOS: Планеталул ялун нигьачIаву дирну дур!» тIисса тIабиаьтраясса луттирдал выставка.
БатIаврил ахирданий 37-чинмур гимназиялул дуклаки оьрчIалгу бувккунни тIабиаьт дуруччаврин хасъсса ххуй-ххуйсса бюххансса шеърирду.