Зузалтран харж къабулаврил хIакъираву райондалул прокуратуралийн бувкIсса информациялул хъиривлаявуртту дуллай, 2017 шинал январь зуруй ххал бувну бур МахIачкъалаллал Ленинский райондалийн багьлагьисса школарду.

АьФ-лул ЗахIматрал Кодексрал 22-мур ва 136-мур статьярдайн бувну, зузалтран гьарица бачIи зурул дянив, организациялул цила, коллективрал, ягу захIматрал икьраллай ккаккан дурсса кьинилия байбивхьуну харж 15 гьантлуяр чIал бувну булун бучIину бакъар.
АьФ-лул ЗахIматрал Кодексрал 4-мур статьялийн бувну, инсан гужирай зузи ан къабучIиссар. Гужирай зузи аврин ккаллиссар ккаккан дурсса чIумуй харж къабулаву ягу му щаллуну къабулаву.
КIицI ларгсса закондалул тIалавшиннарду къадурурччуну, МахIачкъалаллал Ленинский райондалийсса №17 ва №37 гимназиярдал, №№10, 27, 29, 31, 48, 50 школардал зузалтран 2016 шинал декабрь зурул харжирал так 40% буллуну бур.
АьФ-лул ЗахIматрал Кодексрал 236-мур статьялийн бувну зузалтран ккаккан дурсса чIумуй харж къабуллусса чIумал, каялувчитурал му процентру ххи бувну (компенсация дурну) булун аьркинссар. Компенсация дан аьркинссар му ппурттуву­сса Аьрасатнал Центробанкрал ставкардах бурувгун. Гьарица кьини чIумуй къадуллусса арцул 150 бутIул ца бутIа, ялун нан аьркинссар харж булун ккаккан дурсса чIумул хъиривмур кьинилия байбивхьуну, му булуннин.
Цила чIумал ва щаллуну зузалтран харж къабулаврийну идаралул каялувчи агьалинал ихтиярду ва мурадру буруччаврил хIакъиравусса закондалул ххуттава уклакиссар. Вай ишру хIисавравун лавсун 2017 шинал январь зурул 23-нний райондалул прокурорнал шагьрулул округрал администрациялул бакIчинайн тапшур бувну бур закондалуцIун къабавкьу­сса ишру букьан бансса ва ттиния тихунмай мукунсса ишру хьун къабитансса чаран лякъин.
Н.С. Кьадиров,
прокурорнал хъунама кумагчи, юстициялул хъунама
советник
ХIадур бувссар
А. Аьбдуллаевал