Шяпихъал Сулайманнул арс Шяпи
Февральданул 3-нний Бухара шагьрулий ахиратрал хьунни, лакрачIа бакъассагу, щалвагу Дагъусттаннай бусравну бивкIсса ЦIугьур Шяпихъал тухумраясса Сулайманнул ва Калла-Ражухъал Лайлил (аьпа баннав цил) арс Шяпи.
Шяпиев Шяпи Сулайманнул арс увну ур 1943 шинал, щалва оьрмугу лавгун бур, бусурманнал шагьрурдаву ца яла аьламатсса, диндалул щаращун хIисав байсса, Бухаралий.
Цикссагу захIматсса кьинирду дурккунни лакрал агьулданийн, щукру алхIамдулиллагь, лакрал миллат гьарца ишираву яхI-къирият дуну, цайми миллатирттангу бусравну бакI бувккунни. Шама къаммазнал («тройка») хIукму бувну, миллатрал яла язими арсру ва душру, бюхттулсса яхIирал заллухъру, чарий-чару къабивтун, учайхха «сси бунай, ссан дизлай», бухлаган буллай бивкIссар. Му мугьалттуща ххассал хьуну, сайки 400-нния ливчусса ЧIяйннал агьалигу чIурду зевххуну, раскулачит буллай, кIани-кIанттурдайх ппив хьуссар. Мукун Бухаралий миналул хьуссар Шяпихъал Сулаймангу, цачIанма бувцуссар кулпатирттащал ссурвалгу – Гьумай ва Зулайхат (аьпа баннав цал!).
Сулайманнул ва Лайлил кулпатраву буссия кIива душ (аьпа бивухъул), ца арс, мунангу дирзуна цала акъа-къатIа увсса буттал цIа – Шяпи.
Шяпи, ххаллилну школагу къуртал бувну, зий уссия личIи-личIисса давурттай. «Бухара – ДСК-лий, «Бухара – облхлопкотрестрай». Муния махъ, Ташккантуллал политехникалул институтгу къуртал бувну, 35 шинай зий уссия хъунама инженерну «Бухараоблводканалданий», 9 шинай Шяпи уссия Узбакисттаннал ЖКХ-лул министерствалул коллегиялул членну. Шяпи 1988 шинал лайкь хьуссар «Яла хьхьичIунма инженер» тIисса цIанин, 1991 шинал дуллуссар мунан «Заслуженный работник сферы обслуживания Узбекской ССР» тIисса цIагу, медаль «Ветеран Труда» ва м.ц. бахшишру.
Итххявхсса инсан – гьарца аралувугу итххявхсса икIайссар. Шяпи уссия цимивагу пишалул усттар, мунал сянатирттал ккал дуван къабюхъанссар, дувайсса давугу хъинну эмаратну дувайссия.
Шяпихъал ужагърайн Бухаралив «Караван-сарай» учайва, минначIа тай мискинсса 40-50-ку шиннардий хъамал чан къашайсса бивкIун тIий. Шяпинан хъинну ххирая зунттал агьлу, лакку маз, хъинну ххуйну кIула узбакI ва таджик мазру, дустуран дакI дурккун дулун хIадурсса зунтталчу ия.
ДакIния къабуккай Лакрал театр 1991 шинал Бухаралий Шяпинал, ххаллилну хьунагубавкьуну, цала кьамулгу бувсса куц. Дагъусттаннал халкьуннал артист Садикь МахIаммадовлул (аьпа баннав) Шяпинаясса ихтилат: «Шяпи Сулайманович, на ттула оьрмулий къаивсса щархъурду, шагьрурду бакъассар Дагъусттаннай, амма ва Дянивмур Азиянавусса ЧIяйннал жяматрал жу махIаттал бувунну, укун хъамал кьамул баву ттун макIра къаккаркссар, зу бувсса хIурматран кьимат бищун къахьунссар, дус! Бюхълай личIаннав!».
Уттигъанну, аьпа биву, Шяпинащал архIал ивссияв нагу Бухардал хъун хIатталлив, цинявппагу ахиратрал хьусса жула жяматрал вакилтурал гьаттардийн. Щил учинссия шанма зурува тара хIатталлив, ниттил ва буттал чIарав, ссурваврал чIарав, Шяпиналгу гьав хьунссар куну.
Шяпинал ва мунал аьзизсса кулпатрал Татьянал хъуни бувну бур 2 душ ва 3 оьрчI.
Шяпинал бунагьирттал аьпа баннав, гьав нурданул дуцIиннав, Алжаннул ххари аннав цув!
Шяпи ахиратрал шаврил кьурчIишиву кIидачIлай, жижара буллай буру Шяпинал аьзизсса кулпатрахь Татьянахь, душварахь ПатIиматлухь, Лайлихь, оьрчIахь Рамазаннухь, Расуллухь, МахIаммад-Рамазаннухь, мунал куявнахь Давудлухь, ссурахъаврахь-хъинирваврахь, цинявппагу гъан-маччаминнахь, ЦIугьур-Шяпинахъал ва Калла-Ражухъал щалагу агьулданухь.
ЧIяйннал жяматрал цIанияту Шалласу Шалласуев
ХIусманнул арс Ссаламов МахIаммад
Вай гьантрай, азаруннища ххассал къавхьуну, дунияллия лавгунни 1- мур ЦIувкIратусса учитель, Аьрасатнал аьмсса кIулшиву дулаврил бусравсса зузала, ХIусманнул арс Ссаламов МахIаммад.
МахIаммад увссар 1947 шинал удаманнал кулпатраву ЦIувкIрав. ЧIяйннал шяраву школагу къуртал бувну, дуклан увхссар Дагъусттаннал университетравун, кьатIаллил мазурдил факультетрайн. 1969 шинал буттал шяраваллил школалий немец мазрал дарсру дихьлан ивкIссар. Зий унува, мува Дагъусттаннал университетрал тарихралмур факультетгу къуртал бувссар. Муния махъ, ахиратравун гьаннин, немец мазрал ва тарихрал дарсру дихьлай уссия. МахIаммад ия цала пиша, школа, оьрчIру ххирасса учитель. Каникуллал чIумал колхозран кумаг буван МахIаммад ХIусманович дуклаки оьрчIащал тIайла уккайссия Бакреслив, Бажиганнайн, Бабаюртлив. ОьрчIру мудангу ххирасса учитель вив лавсун бикIайссия. Мунал хIурмат дуклаки оьрчIачIа ва архIал зузиминнаву лахъссия, чялишсса гьурттушинна дувайссия мунал шяраваллил ва райондалул оьрмулул иширттаву. Хъярч-махсара ххирасса, хIал бавкьусса, дакI-аьмал хъинсса МахIаммад агьалинан ххирассия. Мунал дустал чIявуссия.
МахIаммад ХIусмановичлул захIматран лайкьсса кьимат бивщуссар Республикалул Минобразованиялул ва райондалул администрациялул. Цува куна оьрму школалий зий гьан буллалисса кулпат Ххадижатлущал хъуни бувссар кIива душ ва арс. Ца акъа-акъасса арснал Кьадинал бивкIулул хажалатгу духIан багьуна ванан. МахIаммад ХIусманович ахиратравун лагаврил кьурчIишиву кIидачIлай, жижара буллай буру кулпат Ххадижатлухь, душваврахь Ажихь ва Аьйшахь, куявтурахь, уссу-ссуннахь, цинявгу гъан- маччацириннахь. Алжаннул ххари уваннав, гьаттай нур дизаннав. Ванан къабуллумур оьрмулул бутIа наслулун ххи бувну лякъиннав!
1-мур ЦIувкIуллал жямат,
дустал, гьалмахтал
Ссаламхъал МахIаммадлуха
Анаварсса марч бувккун
ЛухIи-цIан ттуруллащал,
Парандарал ппив бунни
Вил нязаннивсса оьрму.
Жу, мякь хьунал, хIачIайсса
ОькруцIаллил щаращий,
Кьюнуравун бахьлавгун,
Къуману ливчIуннухха.
АрсначIан ссапар бахIав,
СсичIан анавар увкрав,
ОьтIру-Сун ятин дував,
Кьуцма-РатI къума дував?
Та кьиямасса кьини,
Мяъшарданийн бавтI чIумал,
Ттиркьюкьал чIюн канихьну,
Жущал хьунаакьиннав!
Кьуцмаева ПатIимат
АхIмадил арс Абасов МахIаммад- Рамазан
Вай гьантрай хар-хавар бакъа дунияллия лавгунни 1-мур ЦIувкIратусса, Каспийскалий яхъанахъисса, ххаллилсса жагьил, граждан авиациялул вихшаласса саллатI, ссавруннах эшкьи хьусса летчик, Аьппасхъал АхIмадил арс Абасов МахIаммад-Рамазан.
МахIаммад-Рамазан увссар 1967 шинал ЦIувкIрав. Буттал шяраву школа къуртал байхту, дуклан увхссар граждан авиациялул летчиктал хIадур байсса Краснокутскаллал училищалувун. 1990 шинал мугу къуртал бувну, граждан авиациялул пилотну зун айивхьуссар. 2006 шинал къуртал бувссар Санкт-Петербургливсса граждан авиациялул паччахIлугърал университетгу. 1990 шиная 2000 шинайн ияннин зий уссия «Дагъусттаннал авиалинии» ОАО-лий летчикну, АН-2, АН-24 самолетирттай пилотну. 2010 шинал шиккува аппаратрал управлениялийн инженерну зун увтссия. Махъсса шиннардий зий уссия полетирттал мюхчаншиврулсса буллалисса инспекторну. Ва цимилагу лайкь хьуссар цува зузисса аэропортрал хъуниминнал цIаниятусса Барчаллагьрал чагъардан ва ХIурматрал грамотарттан. 2012 шинал лайкь хьуну ур Гьавалул транспортрал федерал агентствалул хъунама А. В. Нерадькол цIаниятусса Барчаллагьрал чагъарданун.
МахIаммад-Рамазан архIал зузиминнал ва шяраваллил агьулданул дянив хIурматрайсса инсан уссия. Дустуран, гьалмахтуран му ххирассия. ДакI ххуйсса, хасиятрал хъинсса, тIуллу уздансса уссия. Гьар ишираву агьалинал чIарав ацIайссия.
ДакIнийхтуну кьурчIишиву кIидачIлай, жижара буллай буру кулпат Зинахь, арснахь, душваврахь, ссурваврахь, цинявгу гъан- маччацириннахь. Щарссагу, ссурвалгу къума-банд лаган бувну, оьрчIругу ятинтал бувну, нязанний дунияллия лавгсса МахIаммад-Рамазаннул рухI алжаннуву хьуннав, гьаттай нур дизаннав, махъминнахьхьун цIуллушиву дулуннав!
1- мур ЦIувкIуллал жямат
Зайнуттиннул арс Оьмаров Шамил
Уттигъанну, чансса хIаллай къашавайгу ивкIун, дунияллия лавгунни ххаллилсса зунтталчу, Оьмаров Шамил Зайнуттиннул арс.
Шамил увну ур 1955 шинал Ккуллал шяраву. ХIайп, ччяни оьрмулува лавгунни дакI-аьмал ххуйсса, хIал бавкьусса, гьарнащал авкьусса Шамил. Ванан дия 61 шин. МарцIсса ххювардайну школагу къуртал бувну, цайнува цува лавгун, Москавлив кооперативрал институтравун увхссар. ЯтIул дипломращал къуртал бувну товароведениялул факультетгу, ва тIайла увккун ия Смоленскаллал областьрайн, Демидов шагьрулийн, ТОРГ-рал директорну. Хъинну бусравну ва хIурматрай зий тамансса шиннугу дурну, Шамил Дагъусттаннайн зана хьуна. Дагпотребсоюзрал ва тIайла увккуна Ккуллал райпорал председательну, шиккугу тамансса шинну дурна зий. Вания мукьахьгу 2-3 къуллугърай райондалий зий уссия. Махъсса 2 шинай ва зий уссия Москавлив, аптекауправлениялия даруртту тIалав байсса пишалий.
Шамил жуятува личIи шаврил кьурчIишиву кIидачIлай, жижара буллай буру ванал уссур-ссуннахь, кулпатрахь, оьрчIахь ва гъан-маччанахь цинявннахьвагу. РухI хъинний дишиннав, алжаннул ххари аннав, махъминнан оьрмурдай барачат бишиннал. Амин.
Ккуллал жямат
