Вай гьантрай «Илчи» кказитрал редакциялийн бувкIунни аьралуннаву къуллугъ буллалисса жула лакку оьрчI Пайзуллаев Руслан Айвазовичлул хIакъиравусса Барчаллагьрал чагъар.
Андриана Аьбдуллаева
[responsivevoice_button voice=»Russian Female» buttontext=»ВИЧIИ ДИХЬЛАН»] 6882-мур аьрали частьрал командир, полковник С.И. Алейник чичлай ур: «Лакрал ва Ккуллал районнал аьрали комиссариатрал аьралуннаву къуллугъ бан тIайла увксса Руслан Пайзуллаев ттул каялувшиндаралу къуллугъ буллай ур 2016 шинал июль зуруя шихунай. Ва чIумул мутталий ванал ккаккан бунни цува ххуйсса тарбия ларсъсса, жаваблувсса, марцIсса, цайнма тапшур бувсса бигарду багьайкун щаллу байсса аьраличу ушиву.
Руслан хIурматрай ва бусравну ур дустурачIа, иш багьний, чIарав ацIан, кумаг бан хIадурсса, вихшала дишин бучIисса уну тIий. Аьралуннаву къуллугъ буллалиссаксса хIаллай низам ххирасса, кьянкьа-кьурчIисса, ссавур ва бюхъу-бажар бусса, итххявхсса жагьил цимилагу цала командиртурал чулухасса барчаллагьран лайкь хьуну ур.
Щак бакъар, Руслан кунмасса жагьилтал къуллугъ буллай буссаксса жула аьралуннаву, Аьрасатнал халкьуннаща мукIруну бикIан бюхъайссар хIукуматралгу, жяматралгу мюхчаншиврун нигь дакъашиврий, инсантал оьхIалшивурттая бурувччуну бикIаншиврий. Аьрали коллективраву укунсса саллатI чара бакъа аьркинссар ва бусравссар, ми кьянкьану ялув бавцIуну буну тIий коллективраву тIулдакъашивуртту, цайминнай гуж-къия дурсса ишру хьун къабитан.
Ттул хъунмасса тавакъю бур, Аьрасатнал национал гвардиялул къуллугърал сий чIалачIи даву ва укунсса саллатI Аьралуннаву къуллугъ буллан тIутIиминнан эбратну ккаккан аву мурадрай кказитрай рядовой Руслан Пайзуллаевлуя чичаву. Бюхъарча му кказит аьрали частьравунгу гьан бувара, вайми аьралитуран ккаккан бан.
Барчаллагь. ЦIуллушиву дулуннав!».
Редакциялийн ва чагъар бувкIун махъ на хьунабавкьура Русланнул ниттищал Венеращал. Укунмасса барчаллагьрал чагъар ваничIангу бувкIун бия. Гьай-гьай, ххарину бия Венера.
Руслан ванил, адаминагу чIарав акъа, цилалу ччаннай ацIан увсса оьрчI ур. Ниттил ччаврийну ва аякьалийнугу, учительнал гьунарданийнугу ванища ххаллилсса арс тарбия ан бювхъуну бур.
МахIачкъалаллал №31 школагу къуртал бувну, Руслан увххун ур Правовой академиялувун. ЧIивинийва сивсусса, спортрахун агьсса оьрчI ивкIун ур. Ряхра шин хьусса чIумала агьну ур ва футболданухун. Занай ивкIун ур цIанихсса Маркаровлул школалийн. Цимилагу гьуртту хьуну ур личIи-личIисса соревнованиярттай, республикалий акъассагу, Дагъусттаннал ЦачIун дур командалуву Аьрасатнал шагьрурдайгу. Лайкь хьуну ур личIи-личIисса медаллан ва грантирттан.
КIира-шанна шинал хьхьичI Руслан Дагъусттаннал яла гужма нападающийну ккаккан увну ивкIун ур. АрхIала занай ивкIун ур бияврил секциялийнгу (бои без правил).
— ДакI хъинсса, хасиятрал авкьусса уссар. Школалийгу учительтуран ва оьрчIан ххирасса ия. ЧIявусса дустал буссар. Цаннагу миннаха чIалачIин дакъассар. ХIакьинугу мунал дустал ттучIан ялун букIлакIиссар, ци кумаг аьркинни тIий цIухлай буссар. Арулва барз хьунни ттул аьзизсса арс аьралуннавун лавгун. Гьай-гьай, ттун ми 7 шин кунна чIалай дур. Ссавур духларгун ялугьлай бура. Аьралуннавунгу цува рязинур лавгсса. ЗахIматну бикIантIиссар тIий бунува, махъаллил къавхьунни. ЗахIмат ххирасса, цаяра тIалавшинна дусса, цаманал чIарав ацIан, кумаг бан чялишсса уссар, хъунанащалгу, чIивинащалгу маз лякъин кIулссар, мунияту, аьралуннавугу га цIана бусрав хьунни, чIявусса дустал хьунни, — тIий буслай бур Венера.
Шикку букъавсун къабучIир Руслан учительтурал наслулиясса оьрчI ушиву. Ванал ниттил ппу, Ялув ЧIатIлухъиясса Кьурбанов Аьливали Вазирович ва шяраваллил дянивмур даражалул школалул директорну ивкIун ур 20-хъайсса шиннардий. ЦIана Ялув ЧIатIлухъиял школа ванал цIанийсса бур. Венерал цилагу Дагъусттаннал педуниверситетрал социал психологиялул факультет къуртал бувну бур. Зий бивкIун бур МахIачкъалаллал №33 школалий психологну. ЦIана «Венера» тIисса цила салон тIивтIуну, микку зий бур.
Руслан яхI-къирият дусса, мяърипатрал увччусса, ас-намус бусса жагьил ушиврия ца зумату кунма буслай бур Венеращал зузимигу. Аллагьнал уруччиннав. ДакI ххарину зана хьуннав.
