Февральданул 14-нний Дагъусттаннал БакIчи Рамазан Аьб­дуллатIипов гьуртту хьунни АьФ-лул Президентнал Ух­ссавнил Ккавкказуллал федерал округрайсса вакилнал Совет­рал батIаврий. Тикку ххал бигьлай бия округрай террорчишиврул ва экстремистшиврул профилактикалул, цIуллушиву дуруччаврил система ххуй даврил, ва мукунма Аьрасатнал Президентнал ХIукмурду ва тапшур бавуртту дузрайн дуккан даврил ялув бацIаврил тагьарданул масъалартту.

АьФ-лул Президентнал СКФО-райсса вакил Олег Беловенцевлул бувсунни Ухссавнил Ккавкказнаву террорчишиву ва экстремистшиву личIлай душиву яла хъуними нигьачIавурттуну. Ганал тIимунийн бувну, му масъала щаллу буван тамансса хIарачатру бувну бур, амма аьркинну дур террорчишиврущал­сса талатавриву уполномоченный органнал куннащал кувсса хIала-гьурттусса давуртту цахъисгу гужлан дуван. ЛяличIисса къулагъас дуллан аьркинну дур жагьилтурал аралувусса нигьачIавурттал профилактикалух.
Олег Беловенцевлул паччахI­лугъ­рал властьрал органнан тапшур бунни агьалинал оьр­мулул даража лахъ бансса ва зу­зи кIанттурду щаллу бувансса шартIру дузал дуван.
Масъала ххал бигьаврил хIа­къираву мукунма ихтилатру бунни АьФ-лул Президентнал СКФО-райсса вакилнал хъиривчутал Валерий Попковлул ва Михаил Ведерниковлул, Ингушетиянал БакIчи Юнус-Бек Евкуровлул, Дагъусттаннал БакIчи Рамазан АьбдуллатIиповлул, Ставрополлал крайрал губернатор Владимир Владимировлул ва цайминналгу.
СКФО-рал субъектирдай цIуллушиву дуруччаврил система ххуй даврил масъалалул хIакъираву ихтилат Олег Белавенцевлул байбивхьунни АьФ-лул Президентнал Федерал Собраниялийнсса Рисалалувасса калималийну: «Жулла щалла политикалул мяъна хъанахъиссар Аьра­сатнал хъунмур аваданшиву хIисаврай агьали буруччаву, инсаншиврул капитал гьарза баву».
Ихтилатрал ахирданий полпреднал увкунни: «Цалчин ярглий гьамин агьали хъанахъи­ссар медициналул кумаг ххуй­сса бушаврил ккаккияну. Цуксса хIайпнугу, чIявуну бучIай медициналул хIаллихшинну дагьайкун къадуллалаврил хIакъиравусса аьрзарду, медициналул зузалтрал даву кIулшиврул даража ялавай­сса бушиврул хIакъиравусса, медучреждениярттал материаллал ва техникалул шартIру къаххуй­сса душаврил хIакъиравусса аьрзарду». МуницIун бавхIуну регионнал бакIчитурайн тапшур бунни ми иширттах къулагъас хъун дуван.
АьФ-лул Президентнал СКФО-райсса вакилнал хъиривчу Максим Владимировлул бувсунни вакилханалул аппаратрал 2016 шинал контрольданул давурттал хIасиллая. Ганал мукунна дунни округрал субъектирдал исполнительный властьрал органная бувкIсса информациялул ххуй-оьккишиврул анализ.
Журналистътуращал­сса их­тилат­раву батIаврил хIа­силлая буслай, Рамазан Аьбду­ллатIиповлул кIицI бунни батIаву хъинну агьам­сса ва хайрданунсса хьушиву.
ХIадур бувссар
ХI. Аьдиловлул