Вай гьантрай кIицI лавгссар Хъунмасса Буттал КIанттул цIа­нийсса дяъвилий хьусса кIива иш: Ленинград немецнал аьралуннаща щаллуну тархъан баврил (январь зурул 27-нний, 1944 ш.) ва Сталинград шагьрулухсса талатавриву ххув хьусса (февраль зурул 2-нний, 1943 ш.) кьинирду.

Р. Къардашов
Немец аьралуннал Ленинградуллал лагма рургьуну, му вив лавсун хьуссар 872 гьантта. Му мутталий шагьрулия «Уттарашиндарал ххуллийх» эвакуироват бувссар 1,5 млн. инсантурал.
1941 шинал ноябрьданул 20-нния байбивхьуну, ца зуруй ккаккан дурну диркIссар ччатIул 125 грамм оьрчIан, къуллугъчитуран, даву дакъаминнан, 250 гр. – зузиминнан.[pullquote]Хъунмасса Буттал КIанттул цIанийсса дяъвилий гьуртту хьу­ссар Дагъусттанная ­аьрайн бувцусса 150 азарунная ливчусса вирттал.
[/pullquote]
1941 шинфал кIи диркIун дур хъинну дяркъусса, замгьар бу­сса, чурххавун кувку бутлати­сса. Гьавалул темпефратура дагьай­сса диркIун дур дякъил 32 градусрайн дияннин. Ленинград­рай 872 гьантлий ливтIуминнал ккал 630 азарунния лирчусса хьуссар.
Шагьру немецнал аьралуннаща тархъан буллалисса талатавриву жанну дуллуссар 1200-нная ливчусса дагъусттанлувтуралгу. Пискаревский мемориал хIатталлий рирщуну дуссар жула вирттаврал цIарду чирчу­сса Аьпа­лул ула.
Хъунмасса Буттал кIанттул цIанийсса дяъвилий совет халкьуннал ларсъсса Ххувшаврил дайдихьу дурссар Сталинград шагьрулухсса талатавурттал. Къизгъинсса данди бацIавриву ливтIусса ва бивщусса хьуссар 600 азарунния ливчусса аьраличу.
Шиккува бусан, Сталинград шагьрулухсса талатаву хьу­ссар дунияллийсса талатавур­ттава ца яла къизгъинсса, ­оьттул ччар хьусса, 2 млн. инсантурал ливтIусса. Сталинград шагьрулий ва мунил чIарах гьужум бувну нанисса ЯтIул Аьралуннал 330 азара инсан усса немецнал аьралуннал лагма рургьуну дур.
1943 шинал февраль зурул 2-нний фельдмаршал Ф. Паулюс бакIчисса немецнал аьрал канийн бувкIун бур. Ясир увгьуну ур 90 азара душман. Ва талатавриву гьуртту хьуссар чIявусса дагъусттанлувталгу, лакгу, миннавух кIийла Совет Союзрал Виричу АхIмад-Хан Султан ва Совет Союзрал Виричу ЦIаххуй Маккаев.
Сталинград шагьрулухсса рищавривух хIала бувхссар Щурагь ва Анжилив сакин бувсса 91-чин­сса битултрал дивизия.
Жандалий хIайп къаувкуну Сталинград буручлай бивкI­миннавух уссар Ккуллал райондалий цIана ялапар хъанахъи­сса ЧIяйннал шяраватусса Мусал арс Самадов Садикьгу.