Ларгсса нюжмар кьини Журналистътурал кафелуву, «Илчи» кказит итабакьлай байбивхьуния шинмай, яни 26 шинай, хъунама редакторну зий бивкIсса Качар ХIусайнаевал бунни зур бусса барчаллагьрал мажлис.

ПатIимат Рамазанова
Ванищал цал бухьурчагу ихтилат бувма, дусшиву дурма Качар Абачараевнал пасихIсса ва мяъна-мурад куртIсса ихтилат­рал ясир увай. Бур буниялттунгу Качар ХIусайнаеваву инсантал цичIанма кIункIу буллали­сса тIилисин. Ттигъанну Качар Абачараевна цуппа рязину лавг­ссар хъунама редакторнал къуллугърая.
Гьармуниву уздансса жул Качар Абачараевнан ччан бив­кIунни, ххуйсса ххункIгу бивчу­ну, аслийсса лакку мажлис бувну барчаллагь учин цищалва архIал зий бивкIцириннахь, чIарав бацIлай бивкIцириннахь. Найбунува бусанну, Качар Абачараевна хъунама редакторнал къуллугърая гьарчагу, кказитрая ва коллективрая ят буцансса пик­рилий бакъашиву ва шиккува редакциялий отделданул редакторну зунтIишиву. Бусанна жугу му иширая хъинну ххари хьушиву, Качар Абачараевнал даврил опытгу, аькьлугу, маслихIатругу жунма чIяву къахьунтIишиву.
Муданма кунма, ранг-рангсса, ххуйва-ххуйсса тIутIал кацIругу лавсун, ванихь барчаллагь учин бувкIуна кказитрал ва миллатрал муданмасса чIарахбацIулт. Миннаву бия Дагъусттаннал Жяматийсса Палаталул председательнал хъиривчу Ссапарбаг Аьбдуллаев, Лакрал райондалул бакIчи Юсуп МахIаммадов, «Дагестан» ГТРК-лул председательнал хъиривчу Ссалам Хавчаев. БувкIуна Дагъусттаннал печатьрал ва информациялул министр Бурлият Токболатова ва Дагъусттаннал Журналистътурал союзрал председатель Аьли Камалов, луттирду итабакьай басмаханалул хъунама УмархIусман ХIажиев, Да­гъусттаннал миллатирттал кказитирттал редактортал ва цаймигу даврил уртакьтал, бусрав­сса инсантал. Усттарну мажлис бачин бувнугу ия Дагъусттаннал БакIчинал ва ХIукуматрал Администрациялул образованиялул, культуралул ва элмулул отделданул хъунаманал хъиривчу Шалласу Шалласуев. Кказит итабакьлай байбивхьуния мукьах гьар ишираву кказитрал чIарав авцIусса Шалласу Рамазановичлул бувсуна Качар Абачараевнал кказит ччаннай бацIан буван ва республикалул кказитирттаву хьхьичIунсса даражалийн гьаз буван хъунмасса захIмат бивхьушиву, даврил дайдихьу мудангу захIматсса дикIайшиву, ми захIматшивурттавагу узданну бувккун, «Илчилул» кьини бюхттул хьушиву. Качар Абачараевнахьсса гьарманал барчаллагьрал махъругу мура мяъналийсса бия.
Аьрасатнал Культуралул лайкь хьусса зузала Качар ХIу­сайнаевал «Илчилул» ттугъ Аьра­сатнал культуралул лайкь хьусса цама зузалайн, гьунар бу­сса шаэр, прозаик ва публицист Руслан Башаевлуйн тапшур баву щалва миллатрангу, коллективрангу ххаришиврунсса ишри тIий бия циняв. Министр Бурлият Мовсаровнал тIутIиссакун: «Руслан МахIаммадович ур кказитрал масъалартту, миллатрал прессалул къайгъурду ва буруккинтту щиннияргу хъинну кIулсса, даву канилух дурксса профессионал». Качар Абачараевналгу кIицI лавгунни кказитрал цалчинмур номер итабавкьуния шинай Руслан Башаев коллективрачIату хIура къавхьушиву, щалвагу коллективран кьамулсса ва ххирасса инсаннайн кказитрал главреднал къуллугъ тапшур баврийну цилла дакI паракьатну душиву. Коллективрал чулуха барчаллагь тIисса ихтилатру бувна хъунама редакторнал хъиривчуну ивтсса Руслан Къардашовлул ва отделлал редактортал ПатIимат Рамазановал ва Зулайхат Тахакьаевал. Вайнналгу кIицI лавгуна цанма хъунмасса тIайлабацIу хьушиву Качар Абачараевнащал зун, му, даву хъинну кIулсса редактор бакъагу, дакI-аьмал хъин­сса, хасиятрал алвагьсса, коллективравусса гьарманай хъуннасса дакIцIуцIаву дусса инсан бушиву.
Качар Абачараевнахь барчаллагь тIисса ихтилатраву, кказитрай зий бивкIсса, цIанакул бизнесраха зузисса Земфира Шаллаевал бувсуна, цуппа ацIра шинал хьхьичIва коллективрава гьарчагу, хIакьинусса кьинигу «Илчилул» коллективрал членну бусса кунмасса асар яла къалагайшиву.
Аслийсса лакку балайрдайну мажлис чIюлу бувна ХIажиаьли ХIажиаьлиевлул ва Рамил Кьур­банмахIаммадовлул. Ххуй-ххуй­с­са инсантал лагма лавгун, шадну, тяхъану, нахIуну лавгуна барчаллагьрал мажлис.