«Матери России» щалагу Аьрасатнал жяматийсса суккушиндарал Дагъусттаннайсса отделениялул, председатель Таиса МахIаммадовал каялувшиндаралу, дуллай бур цикссагу хъин-хъинсса давурттив.

Бадрижамал Аьлиева
Вана уттигъаннугу, январьданул 20-нний, му отделениялул вакилтурая, Каспийскалий оьрмулул бугьараминнан ва цивппалу ливчIсса инсантуран тIивтIусса Культуралул ва бигьалагаврил «Общение» центрданул вакилтурая сакин хьу­сса делегация бивунни Каспийскаллал коррекционный детский домравун, оьрчIансса ссайгъатирттащал ва нахIу-нацIушивурттащал.
Каспийскалий ЦБС-лучIасса «Общение» клубравун занай бур оьрмулул личIи-личIисса шиннал ва касмурдал инсантал. Миннавасса ца Зугьра Лукьманова багьну бур ссихьри дуллалаврихун, ванил бур авторский коллекция. Му кьини Зугьра Лукьмановал оьрчIащал бунни мастер-классру, ва ва кьинисса батIаврил ахирданийннин оьрчIаща бюхълай бия цалла каруннихь дур­сса ссихьрая пахру буван.
Ва хьунабакьаврил лахъишиврий оьрчIан оьрмулул цаярва хъуниминнал зумату бавунни чIявусса аькьилсса махъру, калимартту, захIмат ххирашивриясса, кувннан кувннал кумаг бавриясса, дусшивриясса учалартту, лувлякъуртту.
КIулсса куццуй, январьданул 20-сса кьини дур Дагъусттан Республикалул Автономиялул кьини. Шагьрулул ОьрчIал библиотекалул хьхьичIунсса пишакар Гулжанат Хасаевал бувсунни оьрчIахь Да­гъусттаннал тарихрал яргсса чIапIая.
Ахирданий ва идаралул директор Нариман Михайловичлул хъамаллуран ккаккан дунни Детдомрал цалла подсобный хозяйство.
Хьунабакьаврия рязийну лив­чIунни цинявппагу – оьрмулул хъуними ва оьрчIру.