Февраль зурул 26 -28 -нний Каспийск шагьрулий Аьли Аьлиевлул цIанийсса спорткомплексраву тIитIлатIиссар (WorldSkills Russia) «Молодые профессионалы» тIисса региондалул II-мур чемпионат.
И. Саидова
Чемпионатрай гьуртту хьунтIиссар МахIачкъалаллал, Каспийскаллал, Буйнакскаллал, Дарбантуллал, Дагъусттаннал Огнилул, Хасавюртуллал, Къизлярдал, Южно-Сухокумскаллал кIулшивуртту дулаврил идарарттаясса 109 дуклаки оьрчI.
Шикку бяст-ччаллу хьунтIиссар 23 журалул, захIматрал пишардал усттаршиву ккаккан давриву. Жагьилсса пишакартурал ккаккан дантIиссар машинартту бакьин баврил, миннуха къуллугъ баврил, сварка даврил технологиярттал, шяраваллил хозяйствалул машинартту зузи баврил, графикалул дизайндалул, web-дизайндалул, янналул дарзишиврул, кондитершиврул, плитка дакьаврил, строительствалул, штукатуркалул ва цаймигу пишардал усттаршиву.
Ларгсса шинал кунма, гьашинугу пишардал усттаршиву ккаккан дуллалисса бяст-ччаллу хьунтIиссар личIи-личIисса кIанттурдай. «Фрезерные работы на станках с ЧПУ», «Токарные работы на станках с ЧПУ» пишардал усттаршиву ккаккан дуллалисса бяст-ччаллу хьунтIиссар Каспийск шагьрулийсса Машинартталсса бай колледжраву, «Ремонт и обслуживание легковых автомобилей» — Автоххуллурдал колледжраву, «Эксплуатация сельскохозяйственных машин» — Буйнакскалийсса шяраваллил хозяйствалул колледжраву, «Сварочные технологии» — «Газпром трансгаз Махачкала» ООО-лул базалий, «Администрирование отеля» — МахIачкъалаливсса «Адмирал» отелданул базалий.
Пишарду машгьур буллалисса чемпионат дуллалиссар WorldSkills тIисса дунияллул халкьуннал суккушиндарал тIалавшиннардайн бувну. Чемпионатрал агьаммур мурадгу, захIматрал пишарду ялун нанисса никиран машгьур баву дур. Конкурсру, чемпионатру дуллай, захIматрал пишардал тIалавшинна ххишала хъанахъиссар, сузирдаву дуклакисса гьунар бусса оьрчIру аьлтту хъанантIиссар.
Чемпионатрай ххув хьусса студентътал кьамул бувантIиссар Аьрасатнал ва Дагъусттаннал региондалийсса хъунисса ва агьамсса предприятиярттай зун.
ЗахIматрал пишардал усттаршиву ккаккан дурну, ххув хьусса оьрчIру гьуртту хьунтIиссар Миллатирттал дянивсса V-мур «Жагьилсса пишакартал» чемпионатрал финалданий Дагъусттаннал цачIундур командалуву.
