Совет Федерациялул Элмулул, кIулшивуртту дулаврил ва культуралул комитетрал тIалавшиндарайн бувну, жула билаятрай най диркIсса «Семья года» щалва Аьрасатнал конкурсраву ххув хьуминнавух бур «Семья – хранитель традиций» тIисса номинациялуву ххув хьусса жула Дагъусттаннаясса Улугбековхъал кулпатгу. Конкурсрал сакиншинна дурну дур Аьрасатнал ЗахIматрал ва соцзащиталул министерствалул, захIматсса иширттавун багьсса оьрчIал чIарах дацIайсса фондрал ва паччахIлугърал регионнайсса министерстварттал ва ведомстварттал.
З. АьбдурахIманова
Конкурсравух гьуртту хьун 79 региондалия аьмну 294 материал дуркIун дур. 35 субъектрая Оргкомитетрайн дуркIун дур конкурсравусса ххюрагу номинациялувух гьуртту хьун ччиминнаясса материаллу. 13 региондалия мукь-мукьра номинациялунсса материал дуркIун дур, 11 региондалия – ца-ца материал.
«Многодетная семья» тIисса номинациялуву гьуртту хьуну бур 70 кулпат, «Молодая семья» – 58 кулпат, «Сельская семья» – 54 кулпат, «Золотая семья России» – 58 кулпат, «Семья – хранитель традиций» – 63 кулпат.
Вайксса кулпатирттава язими личIи баншиврулгу Фондрал сакин дурну дур хасъсса экспертътал ялув бавцIусса, лайкьсса кьимат бищуннин, гьарца материал ххал диргьусса хъуннасса даву.
Аьмну финалданувун бувккун бур 79 кулпат. «Многодетная семья» номинациялуву ххув хьуну бур 22 кулпат, «Молодая семья» – 16 кулпат, «Сельская семья» – 14 кулпат, «Золотая семья России» – 10 кулпат, «Семья – хранитель традиций» – 17 кулпат.
Конкурсрал ахирданий икьрал диркIссар «Семья года. Россия, 2016 год» тIисса, ххув хьусса кулпатирттаясса чичрурду дусса лу итабакьин. ЧIал къавхьуну муниха зий байбишин тIий бусса бур.
Ва даву гихуннайгу дуллантIиссар. Конкурсрал сакиншинначитал тавакъю буллай бур регионнал муниципалитетирттахь ва конкурсрая гьарта-гьарзану цачIа-цачIавагу буслан, му машгьур дуллан ва мунивух гьуртту хьун лайкьсса кулпатирттан кабакьу бан. Укунсса даврил хъунмур мурадгу кулпат ябаврил, буруччаврил, кулпатраву буттал буттахъал аьдатру дурурччуну яшаврил сий-бусрав гьаз бавур, жулла обществалул цIакьсса гьану ххуйсса, эбратрансса кулпатирттай бивзун бушиву ккаккан бавур.
