Циваннив къакIулли, амма махъ ппурттуву телевизор ягу компьютер лавхъни, най буна негативсса хавардугу къабаллай, ххуймуния, хъинмуния бусласимуних вичIи дишин ччан бикIай. Бизар хьунна, шацI хьунна шаттирахун баллайнмасса оьхIалсса хавардая.

Залму АьбдурахIманова
Уттигъанну Дагъус­тта­ннал телевидениялувух Ма­хIачкъалалиясса ца чумартсса хъамитайпалиясса репортаж ккарккун махъ, укунми иширттая цан къабусайривав тIисса къащигума хьунни. Ххуймуния, хъинмуния бусанмургу чансса бакъахьувкун. Ца чIявучин кIулсса Аьрасатнал журналистгума ур: «Хавартту бикIан аьркинссар сенсация дусса!» – тIий. Чири бувсса, рахIму-цIими був­сса халкьуннаясса репортажирттаву ци сенсация дикIанссар?
Республикалул хъуншагьрулул Кировский райондалийн дагьайсса Семендердай ялапар хъанахъисса Мадина Шагьбулатовал Аьшттарханнайн лавгун, тикку аьркинсса тIалавшиннардугу биттур дурну, мушакъатсса 3 оьрчI цилашиврий бивхьуну бур. Шанма мушакъатсса оьрчI кулпатравун буцаву – му нажагь бакъа къахьунабакьайсса ишри тIий бур хасъсса къуллугъирттал пишакарталгу. Хъамитайпалул укун чумартсса къел дуван хъинну агьамсса сававгу диркIун дур. Аллагьнал цинма лякьлул оьрчI къабуллуну, дунияллия махIрум бувнугу ва къабивкIун бур. Мадинал ца акъа акъасса арс захIматсса цIуцIаву дахчуну, хIакинтурайх буклай, дару-дарманну буллалаврихун багьну бивкIун бур. Му ппурттуву хъамитайпалул цихьва хъагу бувну бивкIун бур, арс цIуцIаврища ххассал хьурча, 8 ятинсса оьрчI цила арс-душшиврий бишинна куну. Цивппагу цIуллу-сагъшиврул чулуха заэвсса, чIявучил детдомирттава къабуцайсса, муша­къатсса оьрчIру буцин!
Ванил дакIнил леххаву бавхьунссия цIими ххисса Заннангу, хъин хьуну ур арс. Мадинагу, хъа бувсса куццуй, хъирив був­ккун, цалсса циламанацIун шанма оьрчIал нинугу хьуну, миннал кьажимшиву дуллай бур. ЦIусса кулпатравун багьсса оьрус миллатрал оьрчIру, нюжмар, кIира хьун дуранугу, да­гъусттаннал дукра-къясгу ххира хьуну, яру мазрай ванийн «баба» тIий бур.
Репортажраву цивппагу, инттухунмай арив ччамарду буллалисса чIиру кунма, лечлай, ккуруй бур Мадинал гьарта-гьарзасса, лазилавкьусса къатлуву. ДакI ххари хъанай дур ва пахру багьлай бур жучIава укун­сса кулпатру, хъами бушиврия. Мяйжаннугу, виричусса хъамитайпа! Ва къабигьасса заманнай, хаснува медициналул чулуха къамуксса хъит увкусса жулла республикалий, шанма муша­къатсса оьрчIал ялув бацIаву кулпатравун буцаву лайкьри ацIва оьрчI ябувссаннун. Вайннал ялун ччя-ччяни биллай, цащава шайсса кумаг буллан хIадурну бур Кировский райондалул администрациялийсса попечительствалул ва опекалул отделданул пишакарталгу. Ва репортажравусса хъамитайпалул дурсса даврилгу цал ялагу тасттикь буллай бур чил оьрчIру къабикIайшиву.