МахIачкъала шагьрулул Кировский райондалул администрациялул бакIчи СалихI Сагидовлул ялун нанисса ЦIусса шинал байрандалущал барча бунни ятинсса ва нину-ппу бакъа ливчIсса оьрчIру, чIу ххуйну къабаллалисса ва къюкIсса оьрчIру школа-интер­натирттай, мукунма Республикалул оьрчIал къатлуву тарбия хъана­хъисса оьрчIру.
СалихI Камалович ивунни ми идарарттайсса ЦIусса шинал утренникирттайн, оьрчIащал ва тарбиячитуращал яхши-хаш бувну, барча бунни ми ялун нанисса байрандалущал. Мунал сипталийн бувну, оьрчIан накIлил продукциялул 500 порция (сырокру, творожокру, йогуртру, накI, тартнакI, барт ва м.ц.) буллунни. Ва акциялийн бувну, оьрмулуву захIматсса тагьарунниву ливчIсса оьрчIал оьрму чан­сса бунугу чанна бан, нацIу буван бюхълай бур. Вай идарарттал каялувчитал хъунмасса барчаллагьрай бур СалихI Сагидовлуйн. ЧIу ххуйну къабаллалисса ва къюкIсса оьрчIансса школа-интернатрал директор Зайнаб МахIаммадмирзаева цилва ихтилатраву чIурчIав дуллай бур ва журалул акциярттал цуксса хъуннасса агьамшиву дуссарив укунсса оьрчIан:
— Вай ляличIийсса оьрчIрур, хьхьугу-кьинигу нину-ппу чIарав бакъа, ягу минная архну шикку ялапар хъанахъисса, укунсса акцияртту, оьрмулул хъуниминнал чулуха­сса ургъил, къулагъас вай оьрчIан мудангу хъуннасса ххаришивур. Анжагъ оьрмулул хъунаманащар­хха оьрчIан байран дуван бюхъай­сса, СалихI Камаловичлуллив цимирагу шинни жул оьрчIаха укунсса аякьа дуллай.
Бадрижамал Аьлиева