Дагъусттаннал чичулт, ца зумату кунма, буслан бикIай совет заманнай миллатирттал литературалух дагьайкунсса къулагъас диркIшиву, таржумачитал ххуйну зий бивкIшиву, Дагъусттаннал (мукунма цайми республикарттал) чичултрал произведенияртту оьрус мазрайн таржума буллай. Ва ялагу, махъсса шиннардий мукунсса дакIцIуцIаву сайки дурагу дакъашиву. ДукIу, гьашину укунсса тагьар ххуй чулиннай даххана хъанай дарчунуккар учинсса хIуччарду бур жухьва. Ттигъанну, масалдаран, Москавлив Арбатрай дагъусттаннал поэзиялул стендру дия. Дагъусттаннал чичултрал суратругу, шеърирдугу ккаккиялун бивхьуну бия стендирттай.

Уттигъанну «Литературная газеталийгу» дагъусттаннал поэзиялун хас дурну дия 7 лажин (№ 45»,15-11-2016 шин). Му «Многоязыкая лира России» спецпроектрая буслай, «ОГИ» тIисса издательствалул гендиректор, «Программа поддержки национальных литератур народов РФ на период 2016-2017 годов» центрданул хъунама Дмитрий Ицкович цувагу мукIру хъанай ур чIярусса шиннардий миллатирттал литературалух федерал лагрулий дагьайкунсса къулагъас къадиркIшиву, Аьра­сатнал Президент Владимир Путиннул тапшур бувну хIасул дуршиву цува каялувшиву дуллалисса, ялув кIицI ларгсса программа. «2015 шин Аьрасатнаву Литературалул шинну баян буллалийни, Владимир Владимировичлул кIицI лавгуна ниттил мазурдий чичлачисса шаэртурал произведениярттая цайминнан хавар бакъашиву, миннал произведенияртту оьрус мазрайн таржума буллан аьркиншиву», — тIий ур Дмитрий Соломонович. Буслай ур му программалул лагрулий Аьрасатнал миллатир­ттал литературалул антологияртту итабакьавриха зий бушиву, ттизаманнул прозалух ва поэзиялух, мукунма оьрчIансса литературалухгу къулагъас дуллай бушиву. Вава номерданий Дагъусттаннал Чичултрал союзрал хъунама МахIаммад АхIмадовгу, «Халкьуннал дусшиву – литературалул дусшивур» тIисса девизрал агьамшиву цIуницIа яргсса душиврий чIурчIав дуллай, таржумачитурал школа цIубуккан буван багьлай бушиврия буслай ур. Му ур Совет Союзрай цIанихсса таржумачитал бия, С. Липкиннул, В. Солоухиннул, П. Антокольскийл, Я. Козловскийл, Н. Гребневлул, Ю. Морицлул, К. Симоновлул, Е. Евтушенскийл, Б. Ахмадулинал, И. Лиснянскаял цIарду кIицI лагаврийнува чIалай бур цукун ххаллил­сса таржумачитал бивкIссарив тIий.
Дагъусттаннал поэзиялия­сса проектрал дайдихьу лакралми шаэртурая дур. Ххюя шаэрнал шеърирду бур. ХIасан КIуруховлул ва Сибирбаг Кьасумовлул шеърирду таржума бувну бур Марина АхIмадова-Колюбакинал, Руслан Башаевлулсса – Максим Калининнул, Илияс МахIаммадовлулсса – Валерий Костеленецлул, ттул­сса – Ирина Ермаковал. Ши­ккува бусанна, ттулвами шеърирду «Литературная газеталий» бивщуну бушиву ттунна хаварбакъулийсса ххаришиву хьушиву ва му ххарисса хавар ттунма баян бувсса, мудангу лакрал хьхьичIуннайшивурттая хьхьичIва-хьхьичI ххари шай­сса Алексей ХIажиевлул цинявгу лакрал буккултрал цIанияту чивчуссар вай ххару куну: «Ина бура жул шеърирду «Литературкалий» бушиву ца тIааьннича тIий. Вин кIуллив, кказит бувк­сса кьини Москавлив, кказит­рай ттулва миллатрал шаэртурал шеърирду ккалан ттун цукун тIааьнну бивкIссарив! Ларитан къашайсса ххаришиврущал на поэзиялул отделданувун (му ппурттуву на Дом Книгилуву усси­яв) бувкIцириннан пахрулий кказитрал разворотрай­сса зул шеърирду ккаккан буллай усси­яв!». Алексей ХIажиев цувагу пасихIсса шеърирдал авторди, гьунаргу, дакIгу думари цаманан кьимат бищунгу, цIа дангу, ххаришиву аьч дувангу анавар уккайсса. Алексей мукунминнавассар. Ва ахирданийгу, кIицI буван ливчIунни «Литературкалийсса» лакрал автортуравасса шама «Илчи» кказитрал редакциялий зий ушиву, кказитрайгу шамунналагу кутIасса биографиярттаву му затгу кIицI лавгун бушиву.