Декабрьданул 12-нний, ссят 12 хьусса чIумал Дагъусттаннай дайдирхьуну дур Аьрасатнаву инсантал кьамул байсса кьини, му хас дурну дур АьФ-лул Конституциялул Кьинилун.
Халкь кьамул буллай бия МахIачкъалалив АьФ-лул Президентнал жяматийсса халкь кьамул байсса къатлуву, исполнительный властьрал федерал органнал кIантту-кIанттурдайсса идарарттаву, мукунма республикалул министерстварттаву, ведомстварттаву ва муниципалитетирттаву. Халкь кьамул буллай бия властьрал органнал каялувчитал.
Аьрасатнаву га кьини инсантал кьамул буллай бивкIссар билаятрал Президентнал тапшур баврийну. Инсантал кьамул буллай бия маркIачIаннил ссят 6 хьуннин.
ДакIнийн бутанну, Аьрасатнал Федерациялул Конституция кьамул бувну бивкIссар 1993 шинал, 1994 шиная шиннай Аьрасатнал Президентнал ХIукмулийну га кьини баян бувссар паччахIлугърал байран кьинину.

Анатолий Карибовлул вичIи дирхьунни дагъусттан­лувтурал масъаларттах

Декабрьданул 12-нний ДР-лул ХIукуматрал Председательнал 1-ма хъиривчу Анатолий Карибовлул вичIи дирхьунни да­гъусттанлувтурал захIматнийн багьсса масъаларттах.
Лаващиял райондалия­сса 88 шинавусса Сяид Муъ­минхIажиевлул масъала бия ганан бивхьусса пенсия ссуссукьу баврил хIакъираву. Колхозраву 48 шинай зий ивкIсса захIматрал ветераннан бивхьуну бивкIсса пенсия 2006 шинал хьуну бур 24 азарда къуруш. Амма райондалул судрал ганал пенсия чIиви личIан бувну, 22 азарда къурушрал бувну бур, ганахь щилчIав бувсун бакъар, циван ганал пенсия ссуссукьу бувссарив.
Анатолий Карибовлул телефондалувух оьвкуну захIматрал министерствалийн, тапшур бувну бур захIматрал ветераннал пенсиялул хIалкьазия кIул бан.
Каспийскалиясса ХIабибат Аьлиевал тавакъю бия цила оьрчIан садикрай кIанттурду щаллу баврил хIакъиравусса. «Жу сияхIрайн лавсун бивкIссару Каспийскалий Оьмаровлул кучалий буллай бивкIсса садикрай кIанттурдал щаллу бан ккаккан бувну, садик бувну къуртал баннинма. Та чIумал, жул номергума бивкIссар ярглий сияхIрайн лавсшиву тасттикь буллалисса — №:31. Та чIумала жу цаймигу нитти-буттащал хIала арцу дартIун, садикран аьркинсса муму-тамугума ларсъссар. Утти жухь бувсунни арцул щаллу къабуллай тIий, оьрчIал сад бакIуйн буккан къабувшиву», — увкунни ХIабибатлул.
Анатолий Карибовлул бакI­райн лавсунни яла гъансса чIумуву му масъала щаллу буван. Гара кьини Анатолий Карибов кIул хьунни цаймигу инсантурал социал масъаларттащал ва бакIрайн лавсунни гай щаллу буван.

ХIасан Идрисовлул кьамул бунни 40-нния ливчусса инсантал

Декабрьданул 12-нний ДР-лул ХIукуматрал Председательнал хъиривчу ХIасан Идрисовлул ххал бивгьунни 42 инсаннал аьрза.
5 оьрчIал нину Карина Красновская, ласнацIагу хьуну, цила къаттагу бакъа ливчIун бур. МахIачкъалаллал мэр Муса Мусаевлул бакIрайн лавсун бивкIун бур ганин аьрщарал участок дулун, амма уттигу къакIулну бур гай участокрал документру та ва цукун щаллу бантIиссарив. Балжисса жаваб къадуллуну дур архитектуралул надзорданул управлениялулгу.
ХIасан Идрисовлул ихтилат бувну махъ, шагьрулул аьрщарал луртаннал управлениялул вакилнал бакIрайн лавсун бур ва масъала контрольданулун ласун щаллу буван.
ПатIимат Кагировал аьрза бунни, Красноармейск поселокрал администрациялул зузалтрал, къатта бансса аьрщарал документру бунува, къа­тта бан къабитлай бушиврул хIакъираву.
Вице-премьернал тапшур бунни кIанттул администрациялул зузалтрайн закон лиян дуллалисса давуртту къадуллан.

Билал Оьмаровлул ххал бивгьунни инсантурал масъалартту

Декабрьданул 12-нний ДР-лул ХIукуматрал Председательнал хъиривчу Билал Оьмаровлул ххал бивгьунни цаппара инсантурал щаллу буван захIматсса масъалартту.
Хасавюртуллал райондалул сельсоветрал бакIчи ТIагьир Жумалиевлул тавакъю бунни «Юзбаш» ва «Каднотаракский» къаналлавусса диялдакъашивуртту духлаган дурну, тиккун щин итадакьин.
Билал Оьмаровлул му масъалалул хIакъираву цIуххаву дунни «Минмелиоводхоз РД» ФГБУ-рал директор Залкип Кьурбановлухь. КIанал бувсунни тай къаналлу марцI дуккан дантIий душиву ялун нанисса шинал.
Вице-премьернал бувсунни ва масъала цалва контрольданулу личIлай бушиву.
Билал Оьмаровлул ххал бивгьунни Лаващиял райондалул «Фрунзе» СПК-рал каялувчи Дибир Мусаевлул масъалагу. Ванал тIалав дунни ятту кIинтнил минардайн биян баврин итадакьин аьркинну диркIсса субсидиялул арцу. Б. Оьмаровлул бувсунни арцу итадаркьуну душиву ва шинал ахирданийннин диян тIий душиву ласун аьркинманачIан.
ДР-лул ХIукуматрал Председательнал хъиривчунал ххал бивгьунни цаймигу инсантурал масъалартту.

Рамазан ЖахIпаровлул кьамул бунни инсантал

Декабрьданул 12-нний ДР-лул ХIукуматрал Председательнал хъиривчу Рамазан ЖахI­паровлул вичIи дирхьунни ца­ппара инсантурал масъалар­ттах.
Маржанат Арсланхановал аьрза бунни МахIачкъалаллал райондалул судрая. Ва хъами­тайпалучIа къатта бансса аьрщарал документру бунува, ти­кку къатри дуллай ур цама инсан. Судрал му иширал хIакъираву цукунчIавсса хIукму кьамул бувну бакъар, Маржанатлул цимилвагу аьрза чивчуну бунува.
Рамазан ЖахIпаровлул бакI­райн лавсунни му масъалалул хъирив лавну, закондалул хху­л­лий щаллу буван.
Ванал кьамул бунни цаймигу инсантал.

Дагъусттаннал Роспотреб­надзорданул каялувчинал кьамул бунни инсантал

Декабрьданул 12-нний ДР-лул Роспотребнадзорданул каялувчи Элеонора Оьмариевал инсантурал аьрзарду ххал бивгьунни.
Новостройрайсса ЧIур­ттащиял шяраватусса СултIанат Къажлаевал бувсмунийн бувну, Каспий хьхьирил зуманий «Корсик» тIисса бигьалагай базалул райондалий гостиница буллай бур. Га гостиница буллай бур хьхьиричIату 20-метралул манзилданий, хьхьиричIан нанисса ххуллугу лавкьуну, га бансса ихтиярду документругу бакъанма. Тиккусса шяраваллал жямат гьалак буклай бур хьхьиричIансса ххуллу лавкьуну бухьувкун.
Элеонора Оьмариевал оьвкуну тапшур бунни кIа гостиница буллалисса кIанайн коми­ссия тIайла бувккун, Къажлаевал тIутIимур ххал бувну, ма­съала щаллу буван.
Э. ОьмариевачIан бувкIунни Бика Аьлиева ва цаймигу инсантал.