Амаев Амир къакIулсса щалагу Дагъусттаннай нажагьсса акъахьунссар. Ванал бивтсса захIматрал ххуллия, дурсса хьхьичIуннайсса давурттая, хIукуматрал ванан бивщусса лахъсса кьиматирттая тамансса чивчуссар, бавссар.

Амаев гьуртту хьуну ур Хъунмасса Буттал кIанттул цIанийсса дяъвилий, хъанай ур дяъвилул ветеран. 1943-шинал, май зуруй, кIусса щаву дирну, комиссоват увну ивкIссар. Дяъви къуртал хьуну махъ ванал був­ккуну бур Москавуллал механикалул институт, уттисса МИФИ. Шичча ва, хьхьичIунну дуклай икIаву хIисаврай, тIайлана гьан увну ур зун дунияллийх цIа ларгсса аьлимчу КурчатовлучIасса лабораториялийн. Ва лабораториялияту яла бувссар Атомный энергиялул институт, цийнгу цIана учайсса Курчатовлул институт. Ва институтраву зий лавгссар Амир Амаевлул щалва оьр­му. Дунияллий атомный энергиялуха зузисса цинявгу аьлим­турал дянив ванал цIа мудангу хъинну лахъну диркIссар. Ва ивкIссар атомный реактордайн радиациялул ци асар буллай бурив ххал дуллалисса, ми­кку цукунсса материаллу ишла дан аьркинссарив ххал дуллалисса давриву гьану бивзману. ЧIярусса шиннардий Амаев ивкIссар дунияллул дянивсса атомный энергиялул агентствалуву (МАГАТЭ) зузисса группардал хъунаману. Атомный энергиялийн дагьайсса дунияллий хъанахъисса тамансса совещаниярду ва симпозиумру лавгссар Амир Амаевлул каялувшиндарай.
Амир Амаевлун дуллуну дур Буттал кIанттул цIанийсса дяъвилул орден, ЗахIматрал ЯтIул Ттугълил орден ва тамансса медаллу. 1963-шинал Амаевлун дуллуссар Совет Союзрай яла бюхттулсса Лениннул премия. Ва хъанахъиссар Дагъус­ттаннай Лениннул премиялул цалчинсса лауреат. Му бакъа­ссагу, Амир Амаевлун дуллуну дур СССР-данул Совет министровлул премия, кIилла Атомный министерствалул премия, кIилла Курчатовлул цIанийсса премия, ВДНХ-лул премия ва мукунна цайми-цаймигу премияртту. Амаев хъанай ур элмурдал доктор, профессор, Да­гъусттан Республикалул элмурдал хIурматрал цIа ларсма.
Ваксса укун жаваблувсса даврий цува унугу, Амаевлун тачIав хъамакъабитайва цалва буттал кIану, хьхьичIунсса гьурттушинна дайва гьарцагу дуллалисса жяматрал мероприятиярттай — ГьунчIукьатIув бикIу, Гъумук бикIу, МахIачкъалалий бикIу. Цанма кIулмур, ккавкмур буслай икIайва ялун нанисса никирахь, жагьилтурахь, миннай аякьа дуллай икIайва.
Лакрангу, щалва Дагъус­ттаннангу ххишала бакъа хъунмасса пахру бикIан аьркин­ссар чIивисса миллатрава увксса арс, Амаев Амир, дунияллийх цIа ларгсса, машгьурсса аьлимчу шаврия.
Зиябуттин ХIажимирзаев