Цума-цагу инсаннал цува увсса кьини, хаснура юбилей, кIицI даву ттун лащай муниннин цала бувтсса оьрмулул ххуллул, дурмунил кьимат бишлашавриха. Гьамин, мукун цала оьрмулул 80 шинал юбилей кIицI дуллай ур Ккуллал райондалийсса ЧIяйннал шяравасса АьвдурахIманов ТIалхIат Жабраиллул арсгу.

ТIалхIатлущал кIул хьуну, дусну ттул гьашину сайки 66 шинни. ТIалхIатлун 80 шин хьу­ссар куну бюхъай вих къа­хъанангу. Цанчирча, занакьулу хъанахъаву, хъит-шит, ихтилат – гьарзад дахьра 50-60 шин хьуманал куннасса дур.
Къабигьасса хьуссар ванал оьр­мулул ххуллу. Укуннагу захIматсса, кьянатсса Хъун дяъвилул шиннардий ппугу акъа, хъирив нинугу яла ларгсса ТIалхIатлун биялсса ккаши бухIан, хIарачат буллан багьссар. Ца талихI, чIарав бацIан, ка-кумаг бан тIисса кунма, дакI хъин­сса инсантал бушаву ва шяраву детдом, школалучIа интернат бушавугу хьуну бур.
ХIакьинусса кьинигу барчаллагь тIий, ванал бувсса хъинбаларду цукун лахъан хъиннивав тIисса инсантал лап чIявуссар. ЦIанакул ттучанну бувцIуну бунугу, та чIумал газрал колонка, котел, форсунка, пач лякъин лап захIматссия. Вай щаллу дан, къатлувун чIумуй газ буцин бан ТIалхIатлул цикссаннангу кумаг бувссар, цува «Даггазрал» хъунама бухгалтерну зузи­сса чIумал.
ТIалхIатлун ца бахтти цамургу хьуну бур – цалва оьрмулул гьалмахчуну ххаллилсса инсан нясив шаву. Ванал кулпат Саимат бур хъинну дакI аьчухсса, цува кунма хъамал ххирасса, хъинбала бан хьхьичIунсса. Гьашину вайннал лас-щарну 54 шингу хъанай дур. Вайннал дянив хьусса ххювагу оьрчIгу нитти-буттал иттав бурувгсса, мяърипатрал бувччусса, тIайла бавцIусса бур. Гьарма ду­ккин увну, оьрмулул ххуллийн бичаврищал, цанма-цанмасса къатта-къушлилгу щаллу бувну, оьрчIру ва оьрчIал оьрчIругу хъуни буллай бур. Варихха яла хъунмур талихI!
«Даггазрая» увкьун махъ ТIал­хIат 3 шинай «Газпромрайгу» укуна бухгалтерну зий ­уссия. Тания махъ, хIукуматрал къуллугърай акъанугу, ТIалхIат оьна къаацIайссар. Ишбажаранчиталсса цалва оьрчIал дуллали­сса давурттавух хIала увх­на, миннан кумаг, маслихIатру буллайнари усса.
Чялишну гьуртту шайссар жяматийсса ва политикалул ишир­ттавухгу. Ва ур КПРФ-рал член, увчIуну ур МахIачкъалаллал Кировский райондалул ад­минист­рациялучIасса Хъунисриннал советрал членнугу.
ТIалхIатлун ххирассар цала миллатгу, лакку мазгу, цалла чIири ватангу. Гьуртту шай му чулухуннай дуллалисса давурттавух: ЧIяв дуллалисса давуртту, шяраваллил кьини, хъарас щаву, школалул юбилей ва цаймигу. ТIалхIатлул, цума чIяйричу чув ялапар хъанай урив кIул увну, миннал телефонну, адресру чирчуну, Шалласу Рамазановичлущал цачIуну справочник сакин бувну, итабавкьуну бур.
Шагьрулий ягу шяраву хьусса бивкIу ягу даккаву ТIалхIат акъа къашайссар. БивкIулий алхIам бу­ккаву, дуаь даву къагьану, цайми шагьрурдайссанначIан телефонналувух оьвкуну, пулансса чIяйричугу цахлугу дуаь дувара тIий ия учай­ссар. Му бакъассагу, ивкIуманая кIива-шанма ххуй­сса махъ чивчуну, суратгу тIалав дурну, «Илчилийн» биян байссар, цалла арцугу дуллуну. Вагу хъинну бусрав шай­сса давур.
ВаницIунма бавхIуну, ца укун­сса ишираягу кIицI бан. ТIалхIатлул оьрмулул 70 шин там хьусса чIумал, на ваная радиопередача дурссия. Барчаллагь учин жучIан увкIун уна, ванан хIисав хьуну бия жу чичлансса чагъардал мюхтажну бу­сса. Хъирив кьинива ТIалхIат жучIан лавсун увкIуна щаллусса рулон чагъардал. Жул кIира шин хьухьунссия гай чагъарду ишла буллай, ТIалхIатлухьгу барчаллагь тIий.
ТIалхIатлул дугъришиврия, узданшиврия, дакI­нийхтуну хъинбала бан, чIарав ацIан хьхьичIуншиврия буслан­сса, чичлансса чIявур. Ванаву ду­сса ххаллилсса хасиятирттаву ца цамургу дур – лап ххирар дустал, гьалмахтал. Ванал вай цивппагу чIявур: цачIу зузинийсса, дуклакиний­сса, аьралуннаву къуллугъ буллалинийсса, хIатта хьхьирийн заназийни хьуссагума бур. Ца жула лакрая бакъа, цайми миллатирттаяссагу чансса ба­къар. Яла-яла ТIалхIатлун хъамакъаритайхьунссар цува ятинну ливчIсса чIумал щил-бунугу цахьва бувсмур, насихIатрай був­сса, ихтилат, чIиви-хъунну бувсса ка-кумаг. Утти, цалла каши хьувкун, мукун миннан ка кIидахIин, чIарав ацIан ххявххун найри усса. Ванихлуну чIявучин бусравну, хIурматрайгу ур.
Чансса дакъар ваначIа дакI марцIну захIмат буллалаврихлу дуллусса бахшишру, хIурматрал грамотарттугу. Яла хъунмур бахшишнурив чIалай дур чIявучин цува бусравну ушаву. Лап ххари шай уттигу, цащава щин-бунугу хъинбала бан бювхъусса чIумал. Нагу ваная пахру бувара.
Укунсса урхха, туну, ятинная хьусса ва чумарт, ттулагу дус ТIалхIат, Жабраиллул арс.
ТIалхIатлухь юбилей барча хьуннав тIий, дакIнийхтуну чIа тIий буру вания тихунайгу цIуллуну, сагъну, мукуна чIявучин бусравну, дакIниймур иширайну щаллу бан бюхълай, оьрчIая бивз­минналгу ххари уллай, Саиматлущал архIал оьрмулул уччиннин итаву!
Дустурал цIанияту
Гьарун ХIасанов