Дагъусттаннал сетевая ­ком­пания» ОА-лул пресс-службалул баян бунни МахIачкъалалий сайки 50 –хъул къатри ихтияр дакъанма электроэнергия ишла буллалаврийн бувну, электричествалуцIа бувну бушиву.

И. Саидова
— Ухссавнил Ккавкказуллал Дагъусттаннайсса МРСК-лул мюхчаншиву дуруччайсса депортамент­рал пишакартурал дурсса ххал бигьавурттал ялун личин бунни ихтияр дакъанма электроэнергия ишла буллай бивкIсса 50-хъул чIяру зивурду дусса къатри. Ихтияр къаларсунна электричество ишла дуллалисса къатри 5-райра къатри дур «Оазис»тIисса микрорайондалий, 6-райра къатри дур «Декоративные культуры» тIисса микрорайондалий, 5-райра къатри дур «Наука» тIисса садоводческий обществалий, 10-райра къатри Бейбулатовлул цIанийсса кIичIираву ва 20-райра къатри Редукторный поселокрайсса (Маалинский тIисса кIанттурдай). Ялагу ихтияр къаларсун электроэнергия ишла буллай биривну бур Кировлул цIанийсса райондалий­сса 4- ва къатри. Вай чIяру зивурду дусса къатравун инсантал бивзун хьуну дур сайки шанна шин ва щала мутталий вай инсантал ихтияр да­къанма электроэнергия ишла буллай бивкIшиву исват бувну бур. Энергетиктурал хъирив бивзун, кьимат бивщуну бур вай инсантурал биян бувсса заралданун, — тIий баян буллай бур Дагъусттаннал сетевой компаниялул пресс-службалул.
Вай ххал бигьавурттай биривсса цикссагу къатраву ялапар хъанахъисса инсантал цIана электричествалуцIа хьуну бур. Къатрал заллухъруннащал бувссар цала ихтиярдая бусласисса цикссагу маслихIатру. Электроэнергиялул щаллу буллалими аьрзирай бур къатрал заллухъру электричество ишла буллансса ихтиярдал хъирив къабуклай бур тIий. Вай къатраву ялапар хъанахъиминнал техникалул чулухасса тIалавшиннарду би­ттур дурну дунагу, уттигу тIитIин дурар лицевой счетру, дирхьуну да­къар счетчикру.
Ванияр хьхьичIгу ихтияр да­къанма электроэнергия ишла буллай биривну буссия Редукторный поселокрайсса 35 цIуну бувсса чIяру зивурду дусса къатри. Вай къатрал гьарица зуруй ишла буллай бивкIун бур 3 азарунния 5 азаруннийн бияннинсса кВт.ссятрай.
Дагъусттаннал сетевой компаниялул полициялул зузалтращал ччя-ччяни дуллай бур ихтияр да­къанма электричесво ишла буллалими аьлтту буллалисса ххал бигьавуртту. Укунсса ххал бигьавур­ттайну хъунмасса кумаг хъанай бур электричество низамрайн къабувцуну ишла буллалими аьлтту бан.
КутIасса чIумул мутталий республикалул энергетиктурал дуллалисса чялишсса ххал бигьавурттайн бувну ихтияр къаларсунна электричество ишла буллай биривну бур 85 чIяру зивурду дусса къатри. Энергетиктурал давриву ца яла агьанмур дур ихтияр къаларсунна электричество ишла буллалими бухлаган буллалисса ва ми низамрайн буцлацисса.
Электричествалул чулухасса масъалартту щаллу баву мурадрай Абубакарова 119-мур кIичIираву тIивтIуну бур агьали кьамул буллалисса центр.