ДР-лул Минэкономразвитиялул ккаккиярттайн бувну, Да­гъусттаннал агросекторданул щаллу буллай бур республикалул валовый региональный продуктрал (ВРП-рал) 20%.

ХIасан Аьдилов
Министерствалул информациялийн бувну, шяраваллаву ялапар хъанай бур республикалул агьалинал 54,9%, мугу хъанай дур шяраваллил хозяйствалуву хьхьичIуннайшиву шаврил ца шартIну.
Му мукуннугу, вава ведомствалул бувсмунийн бувну, республикалул дукиялул базардавун чIявучин кьатIату дучIайссар бакIлахъия. Масалдаран, Дагъусттаннайн респуб­ликалул кьатIату дучIайссар сайки 90 азарда тонна дикIул, 381 миллиондалияр ххишала­сса ккунукру, 89 азарда тонна ахъулссаннул, сайки 156 тонна ччатIул ва иникьаллуя дурмунил, 170 азарда тонна ахънил­ссаннул, 37 азарда тонна чава­хъирттал.
Экспертътурал увкусса ку­ццуй, миксса продуктру кьатIату дучIаврил сававну хъанай дур жучIара бакIлахъиялул рынок­рай инфраструктура ва логистика ххуйсса даражалий да­къашиву.
Минэкономразвитиялул хIисаврай региондалул АПК-рал хъинну хьунссия къама ххяххан булларча, къюмайтIутIуха зурча, интенсивсса журалул багъру булларча, теплицардаву ахънилсса дугьларча, ризкьилуха зурча, консервартту дуккан дулларча, минерал щин дулларча.
Мува ведомствалул тIиму­нийн бувну, АПК-раву конкуренция хъанахъаву мурадрай ва бакIлахъия гьарзану ласаваншиврул аьркинссар аьрщараха зузиминнан паччахIлугърал чулухасса кумаг буллан ва техникалул ва технологиялул модернизация дуван. Мукунма аьркинссар лябуккан буллан муштаритурал кооперация.