Санкт-Петербургуллал дунияллул халкьуннал дянивсса культуралул V форумрал «Народное творчество и наматериальное культурное наследие» секциялул лагрулий Санкт-Петербурглив Петропавловский къалалий хьунни Санкт-Петербургуллал Цалчин­сса ремесленный конгресс. Муний гьуртту хьуссар ДР-лул культуралул министр Зарема Буттаевагу.

Бадрижамал Аьлиева
Конгрессрал пленар заседаниялувух гьуртту хьуну, Зарема Буттаевал бувну бур доклад «Сохранение народных промыслов как национального культурного достояния» цIанилусса дискуссиялий. Бувсун бур Дагъус­ттан Республикалий уттизаманнул шартIирдай аслийсса культура цукун дуручлай, цукун хьхьичIуннай дуллай буссарив.
— Щаллагу дунияллийх ларгун дуссар Дагъусттаннал усттартурал цIа. Мунинсса барашиннану хъанахъиссар миннал каруннил дурсса давуртту дунияллул музейрдаву душиву, масалдаран, Эрмитаж ва Лувр, Нью-Йоркливсса Метрополитен-музей ва Лондоннайсса Альбертлул ва Викториял музей, — увкуну бур З. Буттаевал.
ЦIанасса чIумал республикалий аслийсса культура, хасну декоративно-прикладной искусство, ци даражалий, цукун ду­ссарив, ми дуруччаву мурадрай ци ххуллурду, чаранну ляхълай буссарив буслай, Зарема Ажуевнал чIурчIав дурну дур районнай ва шяраваллаву цала-цала тарихийсса пишардал гьанурду лахьхьаврил дарсру дянивсса даражалул школардал программалувун дичирча, му хьунтIишиврий ва ххуллийсса ца хъинну агьамсса давуну. Му даву тIайлабацIусса шаврил мисалданун бувсун бур Оьргърал шяраву ларгсса ттуршукулул 60-ку шиннардия шинмайва дянивмур даражалул школалий 1-мур класс­рава тинмай байбивхьушиву оьргърал заргалтурал искусствалул дарс дихьлай, оьрчIаву дунияллийх цIа дурксса миллатрал культуралухсса ччаву дихьлай, ми му пишарахух гьан буллай.
Цилва докладраву министр­нал бувсун бур республикалий хIакьинусса кьини бушиву халкьуннал художествалул промыслирдал кьай-кьуй итадакьлакьисса 20 предприятие, халкьуннал художествалул промыслирдал аралуву зий 2 500-нния ливчусса инсантал бушиву, ва шинал республикалул художествалул промыслирдал, канил пишардал язими бизнес-проектирдан дурххушиву 19 грант аьмну 4030, 0 азарда къурушрансса. Министрнал гьарта-гьарзану бувсун бур республикалул районнай ва шагьрурдай тIивтIусса Аьрасатнал халкьуннал аслийсса культуралул центр­дая, миннул даврия, Респуб­ликалул БакIчинал культуралух дуллалисса аякьалия.
Конгрессрал давривух мукунма республикалия гьуртту хьуссар ДР-лул Халкьуннал художествалул промыслирдал центрданул директор КьурбанхIажи ХIусайнов ва мунал хъиривчу Арсен ХIусайнов.
Конгрессрал лагрулий хьу­ссар халкьуннал канил пишардал давурттал выставкагу, муний жулла республикалул ус­ттартурал дурмургу дирхьуссар ккаккиялун.
Выставкалул давривух гьур­тту хьуссар Аьрасатнал Федерациялул 25 субъектраясса, СНГ-лул билаятирттаясса ва чил билаятирттаясса делегациярду.