МахIачкъалаливсса Башларовлул цIанийсса медициналул колледж Аьрасатнавусса яла хьхьичIунсса ттуршва ссузрал (колледжру, техникумру, училищарду) кьюкьлуву хьунни. Ми хьхьичIунми заведениярттан бахшишру дуллунни ноябрь зурул ахирданий Санкт- Петербурглив хьусса «Проблемы и перспективы развития среднего профессионального образования в России»тIисса Аьрасатнал конференциялий.
Конкурсраву гьуртту хьуну бур паччахIлугърал лицензия ва аккредитация дусса Аьрасатнал ссузру. ХIисавравун ларсун дур ми ссузирттал куртIсса ва цIакьсса кIулшивуртту дусса пишакартал итабакьаврил хIасиллу. Бахшишру дуллалисса церемониялий гьуртту хьуну бур колледжрал хъунмур ПатIима Сулайманова ва мунил хъиривмур Жамила Зайналова. «Европейское качество» тIисса мусил медальлануцIун, колледжрал директорнан «Директор года – 2016» хIурматрал лишангу дуллуну дур. Ва конкурс хIасул бувну бур Аьрасатнал ссузирттал Директортурал союзрал ва ПаччахIлугърал Думалул Комитетрал, элмулулсса, дуккаврилсса ва культуралулсса буллалисса Федерациялул Советрал ва Жяматийсса палаталул комиссиялул вакилтал бухлахисса Независимый Советрал уртакьну. Гьаннайсса, билаятрал хьхьичIунми комитетирттал вакилтурал хъинну хъирив лавну ххал диргьуну дур конкурсрай гьуртту хьусса ссузирттал даву. Дагъусттанналмур колледжрал даврин лахъсса кьимат бищаву – жучIарагу кIулшивуртту дулаврил даву къаоьккисса даражалий душаврил барашиннар. ХIатта цаппарарагу дуккаврил заведениярттаву.
Лажин хIадур дурссар
П. Рамазановал
