2016 шин дайдирхьуния шинмай МахIачкъалалив сияхIрайн ларсун дур 139 ДТП. Миннуву 11 ахьттачу оьрмулуцIа хьуну ур, 137 инсаннайн щавурду дирну дур. Укунсса иширттал чIалачIи буллай бур шупIиртуралгу, бахьттагьалтралгу ххуллул низам къадуручлай бушиву.

Цавай машинартту ле­ххан бувну най бур, вайми тIурча ккаккан къабув­сса кIанттурдай ххуллу лахълай бур.
Декабрь зурул 15-нния байбивхьуну 22-ннийн бияннин МахIачкъалалив нанисса «Пешеход» операциялул агьаммур мурад бия шупIиртал ва бахьттагьалт ххуллул низамрава бувксса ишру хьун къабитаву.
ХIакьинусса кьини ва ма­съала Госавтоинспекциялул зузалтрал хъуннасса къула­гъас­ралун лавсун бур. Статис­тикалул чIалачIи буллай бур МахIачкъалалив хьусса цинярдагу авариярттал 50% бахьттагьалтрайн машина щусса ишру бушиву.
Хъунмасса буруккин бутлатисса масъала бур ДТП-ву чIявусса мюрщисса оьрчIан апатIру хъанахъаву. Ва жуятура нанисса шинал машина щуну ивкIуну ур ца оьрчI, личIи-личIисса цIунцIияртту хьуну дур 22 оьрчIан. Хъуниминная эбрат ласлай, жула оьрчIругу бур бахьттагьалтран ккаккан къабув­сса кIанттурдай ххуллу лахълай. Нину-ппу чIарав бакъасса чIумал ми ххуллурдайн бувккун, тIуркIу тIий бур. Му бакъассагу, оьрмулун нигьачIаву дусса ххуллул шанбачIурттай ва заправкарттай бавцIуну арцу ляхълай бур.
«Пешеход» операциялул лагрулий МахIачкъалалив ДПС-лул Полкрал зузалтрал бунни ххуллул низамрава бувкминнащал бувчIин бавуртту дуллалисса, дюъ дихьлахьисса ихтилатру. Автоинспектортурал бувчIин бунни шупIиртуран ва бахьттагьалтран ххуллул низам кIулшиврул ва му дуруччаврил, ххуллийн бувккукун куннал хIурмат куннал баврил ва жаваб­лувшинна дуну сукку тIаврил мюхчан бантIишиву ми цив­ппагу, цаймигу ххуллурдай­сса апатIирттая.
Балугъравун къабивсса бахьттагьалтрайн машинартту щу­сса ишру чIяву хъанай тIий, полициялул зузалтрал хъуннасса къулагъас дуллай бур оьрчIру мюхчан баврих. Школардай дихьлай бур ва масъалалун хас дурсса дарсру. Гьарица школалий дурну дур оьрчIру школалийнгу, махъунмайгу мюхчанну занансса план-схемартту. Школардай профилактикалул даву цукун дуллай бурив ххал дуллай бур ДПС-лул Полкрал инспектортал ва кIанттул властьрал вакилтал.
Ххуллул низамрава бувксса шупIирталгу, бахьттагьалтгу кIункIу буллалиссар административ жаваблувшиндарайн.
РСФСР-нул КоАП-рал 12.29 статьялийн бувну ххуллул низамрава увксса ахьттачунай 500 къуруш аькIлул дишин бю­хъайссар.
ХIурмат бусса бахьттагьалт!
Ххуллу лахълахъийни мюхчанну бикIияра. НигьачIаву дакъашиврий мукIру хьуну бакъа ххуллийн мабуккару.
ШупIиртурайнгу оьвчаву дуллай буру: бахьттагьалт ла­хъан ккаккан бувсса кIанттурдай ми хьхьичI итабакьияра.
ДакIний битияра, мукунсса кIанттурдачIан гъан хъанахъи­сса чIумал машина хIурхIа бан ягу бацIан бан аьркиншиву.
Лиана Наврузбекова,
полициялул хъунмур
лейтенант