Декабрьданул 16-нний МахIачкъалаллал Кировский райондалийн багьайсса федерал ххуллуцIсса Красноармейскаллал чIарав сквер бансса кIану марцI бувну, бакьин бувну, хIадур бувну бур.

Шикку диркIссар чIярусса шиннардий строительствалул цIинцI дичлачисса хъуннасса свалка. Хьхьу-кьини дакъа ххюва гьантлул дянив зий, хасъсса техникалул ши­ччалу марцI бувну бур.
Цуппа кIану лагь-лахъсса буну тIий, хъунмур даву дурну дур гусеничный тракторданий. Амру бу­ссар, шичча байбивхьуну, Семендердайн бияннин федерал ххуллу, тиягу-шиягу марцI бувну, низамрайн буцинсса. Вай давурттал ялувгу авцIуну ур Кировский райондалул бакIчи СалихI Сагидов. Ванал бусаврийну, ва кIанттух къулагъас дурну дур республикалул каялувчитуралгу, мунияту шикку унгу-унгусса давурттивгу щуруй ду­сса дур.
«Жу цIана хъунмур къула­гъасралун ласарду шагьрулул зума-къирагърайсса щархъурду ва поселокру. Ми тIурча Кировский райондалий дур 8. Агьамми давур­ттугу дуллай байбивхьуру федерал ххуллуцI. Мукунсса амру бивкIссар Р. АьбдуллатIиповлуягу. Муниятур Красноармейскалий ва Семендердай сайки нюжмардий техника зузисса»,-буслай ур С. Сагидов. Ванал бусаврийну, най ду­сса дур шикку бувансса скверданул хIакъиравусса давурттивгу.
«Жула хъуншагьрулий паркру ва скверду чIявусса бакъар. Вай бакъашиврул сававгу хъинну цанничIан ца гъанну дурсса къатри ва идарар­тту бур. Мунияту укун цахъи илкин­сса кIану биривукун, скверду, паркру бан аьркинссар», -буслай ур райондалул бакIчи.
Мукуна ва тавакъю буллай ур цала райондалул халкьуннахь ччи-ччинийн ччюрк къадичлай, ми дичин ккаккан дурсса кIанайн дичияра тIий.
Красноармейскаллал халкьгу хъинну ххарину бур шагьрулул хъуниминнан дан дакIнийн багьсса даврия. СалихI Сагидовлущалсса хьунабакьаврий Красноармейскалия­сса халкьуннал чулухасса хъуначунал тавакъю бувну бур ихтияр да­къанна дуллалисса къатрал строительство дацIан дувавриву цал чIарав ацIан ва марцI бувсса кIанайн вания гихуннай ччюрк къадичланшиврул­сса чаранну лякъин.
ХIадур бувссар
З. АьбдурахIмановал