Ислам гьаз дуллай оьрму бувтма
Декабрь зурул 5-нний дунияллия лавгунни Аьрасатнал Исламрал комитетрал председатель, Аьрасатнал Национальная ассамблеялул депутат, философ, политик, жяматийсса ишккакку, шаэр Гейдар Жамал.
ПатIимат Рамазанова
Азирбижаннал художникнал, Аьрасатнал лайкь хьусса Жахид Жамаллул ва Дуровлул цIанийсса театрдануву зий бивкIсса профессионал наездницал Ирина Шаповаловал арс Гейдар цувагу Наполеоннул аьралунная Машрикьуллал Пруссия мурахас бувсса 1812 шиналсса дяъвилуву гьуртту хьусса генерал Дмитрий Шепелевлул варисри (ниттил ляхъиндалийхчIинсса). Гейдар Жамаллул щалва оьрму хас бувссар исламрал дин ва культура лахьхьаврин, мунал тамансса луттирду чивчуссар исламрая. Му ия исламрал куртIсса кIулшивуртту дусса интеллектуал, ччарча аьрасатнал телевидениялул мэтр Владимир Познердущал, ччарчагу тарихрал элмурдал доктор, Эрмитажрал хъунама Пиотровскийщал миннал даражалий бюхханну ихтилат буван шайсса дурккучу.
Гейдар Жамаллул бивкIу кьувтIусса чIявусса агьали социал сетирдай жижара буллай, мунал арснащал, душнищал ва му ххирану бивкIцириннащал кьурчIишиву кIидачIлай бур. Язисса инсаннацIа хьусса кунмасса асар бур дакIниву тIутIиссагу бур. Бур шаэр хIисаврай мунан лахъсса кьимат бишлашиссагу. Бур муная личIи-личIину гъалгъа тIутIиссагу. Инкар буван къашаймурдив ца бур: Гейдар Жамал ца яла язима ивкIшиву аьрасатнал интеллектуалтурал дянив, исламрал дунияллий мунал сий хъуннасса диркIшиву, мунал вяъзардах агьали пахъ багьну вичIи дирхьуну бивкIшиву ва му акъашиву хъинну асар хъанантIишиву. Мунал дус, жяматийсса ишккакку ва журналист, «Кавполит» порталданул редактор Максим Шевченко ур мунайн «Занная дакъа нигь дакъасса интеллектуал» тIий. Увччунни Гейдар Жамал му дунияллия лавгсса Алма-Аталивсса ( ва шикку захIматсса азар хъин дуллай ивкIун ур) хIатталлив. Бусурманчу къуртал хьусса кIанттай уччин аьркинссар тIисса исламрал аьдатрайн бувну. Цув Алжаннул ххари уваннав!
