Декабрь зурул 27-нний Аьрасатнаву кIицI лагайссар Ххассал бувулт­рал кьини. Ва кьини ххассал бувултрал пишалул байран хIисаврай кIицI дуллан бивкIссар 1995 шиная шихуннай Аьрасатнал цалчинма Президент Борис Ельциннул ХIукмулийн бувну. Байран кIицI дулланнингу, дуллан бивкIун махъгу, цимилагу мугьлат бакъа леххаврий був­ккун, захIматсса шартIирдай зий, балаллухьхьун биривсса азарахъул инсантурал оьрмурду ххассал бувну бур ва службалуву зузиминнал. Ххассал бувултрал пишалул байрандалун хас бувсса шадлугърал мажлис хьунни ва кьини Дагъусттаннал МЧС-рал Агьаммур управлениялийгу. Ххассал бувулт барча бан бувкIун бия МахIачкъала шагьрулул администрациялул бакIчинал хъиривчу Камил Изиев ва ДР-лул Халкьуннал Мажлисрал депутат Муслим Исмяилов.

Андриана Аьбдуллаева
Мажлис тIитIлай, ххассал бувулт барча буллалисса ихтилат бунни Дагъус­ттаннал МЧС-рал Агьаммур управлениялул хъунама, генерал-майор Нариман КазимахIаммадовлул. Цала ихтилатраву ванал бувсунни республикалул ххассал бувултрал службалул дуллалисса давур­ттая, кIицI лавгунни ларгсса шин министерствалул зузалтран хъинну захIматсса диркIшиву.
— Ларгсса шинал республикалий хьу­сса цIу ларчIсса ва цаймигу ляличIисса захIматсса тагьар хIасул хьусса ишир­ттаву Дагъусттаннал ххассал бувултрал ва цIу лещан дувултрал, гьар мудан кунна, ларайсса пишакаршиву, иш-тагьар кIулшиву ва бюхъу-бажар бушиву кка­ккан бунни. Ларгсса шинал республикалий жул пишакартурал лещан дурну дур 722 пожар, цIу ларчIсса кIанава хха­ссал увну ур 560 инсан. Багьа бищун къашайсса даву дурссар ххассал бай службардал тIабиаьт гьалак дурксса иширттавугу. 2016 шин дайдирхьуния шихуннай республикалий 15-ла захIматсса тагьар (ЧС) хIасул хьуну дур. Ми ишир­ттаву 1000-хъул инсантуран кумаг бувну бур МЧС-рал пишакартурал, — бувсунни Нариман КазимахIаммадовлул. Хъирив ххассал бувулт барча буллалисса ихтилатру бунни Камил Изиевлул ва Муслим Исмяиловлул.
Вайннал чIа увкунни ххассал бувултрал кумаг аьркин багьлагьисса ишру чансса хьуннав, куну. Ихтилатру къуртал хьуну махъ хьхьичIунсса ххассал бувултран дуллунни личIи-личIисса наградартту. Камил Изиевлул дуллунни МахIачкъала шагьрулул бакIчинал чулухасса грамотартту ва цIа кусса ссятру. Дагъусттаннал МЧС-рал Агьаммур управлениялул цала чулухагу дуллунни ххассал бувултран орденну, медаллу, званияртту ва грамотартту. Вайннал наградартту дуллунни мукунна захIматсса ва цала оьрмулун нигьачIаву дусса тагьардануву цайми инсантал ххассал бувсса дагъусттанлувтуран. «За спасение утопающего» медаллу дуллунни бярув оькьлакьисса 5 шинаву­сса оьрчI ххассал увсса Гъумучиял дянивмур даражалул школалул дуклаки душру Садикьова Аидан ва Муслимова Аминан.
Аьрасатнал МЧС-рал Барчаллагь баян бунни цала давриву чялишсса гьур­ттушинна дуллалисса цаппара редакциярдангу. Барчаллагьран лайкь хьуминнавух «Илчи» кказитрал редакциягу бия.
Мажлис наниссаксса хIаллай ккаккан дуллай бия личIи-личIисса иширттаву, захIматсса шартIирдай зузисса ххассал бувултраясса видеосюжетру.